2003 වසරේ වූ මේ සිද්ධිය එවකට බදුලු පුරවරයම හෙල්ලූ ආන්දෝලාත්මක සිදුවීමක් විය.
2003 වසරේ ජූනි මස 03 වැනි දින කොළඹ සහ රත්නපුර සුප්‍රසිද්ධ මැණික් ව්‍යාපාරිකයන් කීප දෙනෙකු විසින් බණ්ඩාරවෙල පූනාගල ප්‍රදේශයේ දල්ගොල්ල විහාරස්ථානයේ දී මොණරාගල ඔක්කම්පිටිය ප්‍රදේශයෙන් රැගෙන ආ මැණිකක් ලක්‍ෂ 120කට මිලදී ගැනීමට සාකච්ඡා කර පසුව ලක්‍ෂ 60කට වෙළෙඳාම් කළ බවටත් පසුව එය රත්නපුරට සහ බළන්ගොඩ ප්‍රදේශයට රැගෙන ගොස් පැමිණ එය ව්‍යාජ මැණිකක් බවටත් පැමිණිලි කර ඇත.
ඒ සම්බන්ධයෙන් දෝවේ රජමහා විහාරයේ විහාරාධිපති හිමියන්ට එරෙහිව පහසුකම් සලසා වංචා කළ බවට චෝදනා කළ අතර පසුව විහාරාධිපති හිමියන් ඇතුළු තවත් සැකකරුවන් 05ක් අත්අඩංගුවට ගන්නා ලදී.
මෙහිදී අදාළ මැණික මුලින්ම විකිණීමට ඉදිරිපත් කරනු ලැබුවේයැයි කියන ව්‍යාපාරිකයා ද අත්අඩංගුවට ගත් නමුත් පසුව ඔහු නිදහස් කෙරිණි.
පසුව නීතිපතිවරයා විසින් 2006 වසරේදී බදුල්ල මහාධිකරණයේ අධි චෝදනා ගොනු කරන ලද අතර මේ අධි චෝදනාවට අනුව මැණික මිලදී ගැනීමට පැමිණි පැමිණිලිකරුවන් අතර සිටි
පුද්ගලයන් දෙදෙනෙකු ද චූදිතයන් ලෙස නම් කර සිටි අතර පසුව ඔවුන් නීතිපතිවරයා විසින් නිදහස් කර රජයේ සාක්‍ෂිකරුවන් බවට නම් කරන ලදී.
අනතුරුව දීර්ඝ නඩු විභාගයකින් පසුව බදුල්ල මහාධිකරණ විනිසුරුතුමන් වන රවීන්ද්‍ර ප්‍රේමරත්න මහතා විසින් 2024 ජනවාරි මස 10 වැනි දින මේ නඩුවේ තීන්දුව ප්‍රකාශයට පත් කෙරිණි.
බදුල්ල මහාධිකරණ විනිසුරු රවීන්ද්‍ර ප්‍රේමරත්න මහතා විසින් තීන්දුව ප්‍රකාශයට පත් කරමින් පැමිණිලිකරුවන් වංචාවකට ලක්වූවා ද යන්න සම්බන්ධයෙන් සාධාරණ සැකයක් මතුවන බවත් විත්තිය විසින් ගෙනා ප්‍රධානම තර්කය වූ එය වංචා කළ මැණිකම ද යන සැකය මතුවනුයේ ඒ සම්බන්ධයෙන් වූ දාම සාක්‍ෂි ඔප්පු කර නැති හෙයින් බවටත් හේතු දක්වමින් සියලු චූදිතයන් නිදොස් කොට නිදහස් කරන ලදී. දෝව රජමහා විහාරාධිපති හිමියන් වෙනුවෙන් නීතිඥ කවීෂා ලද්දුසිංහ,නීතිඥ කිෂාන් පෙරේරා,නීතිඥ ගීත් ජයසිංහ සමඟ ජ්‍යෙෂ්ඨ නීතිඥ රුවන් උඩවෙල මහත්වරුන් පෙනී සිටියහ.
