අධිකරණ නියෝග කඩ කරමින් නීති විරෝධී ලෙස උද්ඝෝෂණයකට එක්වූ බවට සමගි ජන බලවේගයේ පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මිය ඇතුළු සැකකරුවන් 12 දෙනාට එරෙහිව ගොනු කළ නඩුවේ අධිකරණයේ පෙනී නොසිටි රොසෙල් විජේරත්න යන අයට වරෙන්තු නිකුත් කරන ලෙස කොළඹ ප්‍රධාන මහේස්ත්‍රාත් ප්‍රසන්න අල්විස් මහතා ඊයේ 26 නියෝග කළේය.
කොටුව මහේස්ත්‍රාත් තිළිණ ගමගේ මහතා නිවාඩු බැවින් කොටුව අධිකරණයේ වැඩ ආවරණය කරමින් මහේස්ත්‍රාත්වරයා මෙම නියෝගය සිදු කළේය.
සිද්ධිය සම්බන්ධයෙන් නඩුව විවෘත අධිකරණයේ කැඳවූ අවස්ථාවේදී පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මිය ඇතුළු සැකකරුවන් 11 දෙනකු අධිකරණයේ පෙනී සිටි අතර නඩුව නීතිපති උපදෙස් සඳහා ලබන මැයි මස 31 යළි කැඳවන ලෙස මහේස්ත්‍රාත්වරයා නියෝග කළේය.
පසුගිය වසරේ ජනාධිපති රනිල් වික්‍රමසිංහ මහතාගේ පුද්ගලික නිවසට ගිනි තැබූ ජූලි 09 වනදාට දින දෙකකට පෙර සිදු කළ උද්ඝෝෂණයේදී අධිකරණ නියෝග කඩ කළ බවට හිරුණිකා නෙරංජලී ප්‍රේමචන්ද්‍ර, නිරූපමා කරුණානායක, සප්නා දීපසිකා, චමිලා නිලානි අබේකෝන්, රොසෙල් විජේරත්න, සඳරුවන් රොද්‍රිගු, යූ. ප්‍රකාශ්, ගිහාන් අල්මේදා, රවීන්ද්‍ර පනාවිල, විජේරත්න ජයවික්‍රම, රම්සික, කාවින්ද උදයංග, ඇතුළු පිරිසක් ඇප මත මුදා හැර ඇත.
සුභාෂිණි සේනානායක
