ජාත්‍යන්තර ක්‍රිකට් කවුන්සිලය විසින් පසුගිය වසරේ (2023) ජගත් විස්සයි20 ක්‍රිකට් පිටියේ දැක්වූ දස්කම් මත වසරේ දක්ෂතම ක්‍රීඩකයා සහ ක්‍රීඩිකාව ඊයේ නම් කළේය.
ඒ අනුව වසරේ දක්ෂතම ක්‍රීඩකයා ලෙස සම්මාන දිනා ගැනීමට ඉන්දියාවේ සූර්යකුමාර් යාදව් සමත් වූ අතර, බටහිර ඉන්දීය කොදෙව් නායිකා හේලි මැතිව්ස් වසරේ විස්සයි20 ක්‍රීඩිකාව ලෙස සම්මානයට පාත්‍ර වූවාය. සූර්යකුමාර් මේ සම්මානය හිමි කර ගත්තේ පිට පිට දෙවැනි වරට වීම විශේෂත්වයකි.
ඔහු වසරේ අයිසීසී විස්සයි20 ක්‍රිකට් කණ්ඩායමේ නායකයා ලෙස ද නම්කර තිබේ.
හේලි වසරේ ක්‍රීඩිකාව ලෙස සම්මාන දිනා ගත්තේ පසුගිය වසර තුළ තරග 14කදී ලකුණු 700ක් රැස් කරමින් සහ කඩුලු 14ක් බිඳ දමමින් දැක්වූ දස්කම් හේතුවෙනි. ශ්‍රී ලංකාවේ චමරි අතපත්තු ද මේ සම්මානයට නිර්දේශ වී සිටියාය.
හේලි මේ සම්මානය හිමි කර ගත් දෙවැනි කොදෙව් ක්‍රීඩිකාව බවට පත් වූ අතර, ඇයට පෙර 2015 වසරේදී හිටපු නායිකා ස්ටැෆනි ටේලර් මේ සම්මානය දිනා ගත්තාය.
පසුගිය වසරේ නැඟී එන අයිසීසී ක්‍රීඩකයා ලෙස නවසීලන්තයේ රවින්ද්‍ර රචින් සම්මාන දිනාගත් අතර, මේ සම්මානයට ශ්‍රී ලංකා යොවුන් වේග පන්දු යවන ක්‍රීඩක ඩිල්ෂාන් මධුෂංක ද නිර්දේශ වී සිටියේය. නැඟී එන ක්‍රීඩිකාව ලෙස ඔස්ට්‍රේලියාවේ පොඑබ් ලිච්ෆීල්ඩ් සම්මාන දිනා ගත්තාය.
