Saturday, April 5, 2025
Home » ශ්‍රී ලංකා යොවුන් ක්‍රීඩකයෝ ලකුණු 77කින් නැමීබියාව පරදවති

ශ්‍රී ලංකා යොවුන් ක්‍රීඩකයෝ ලකුණු 77කින් නැමීබියාව පරදවති

by sachintha
January 25, 2024 2:13 am 0 comment

 

සුපුන් වඩුගේගේ සටන්කාමී පිතිහරඹයත් පන්දු යවන්නන්ගේ දක්ෂතාත් හේතුවෙන් අවුරුදු 19න් පහළ ලෝක කුසලාන ක්‍රිකට් තරගාවලියේ මූලික වටයේ දෙවැනි තරගයෙන් ලකුණු 77ක විශිෂ්ට ජයක් හිමි කර ගැනීමට ශ්‍රී ලංකා යොවුන් පිල ඊයේ සමත් විය.

දකුණු අප්‍රිකාවේ කිම්බර්ලිහිදී පැවති මේ තරගයේදී ශ්‍රී ලංකා පිල හමුවේ නැමීබියාව පරාජයට පත් විය. මේ ජය සමඟ ‘සී’ කාණ්ඩයෙන් තරග වදින ශ්‍රී ලංකාව ප්‍රසාද ලකුණු සටහනේ පෙරමුණ ගැනීමට ද සමත් විය. එක් කාණ්ඩයකින් කණ්ඩායම් 3ක් සුපිරි 6 වටයට සුදුසුකම් ලබන බැවින් මේ ජය සමඟ ශ්‍රී ලංකා කණ්ඩායම එම වටයට එක්වීමේ අවස්ථාව උදා කර ගත්තේය.

ලෝක කුසලාන තරගාවලියේ 12 වැන්න වූ මේ තරගයේ පළමුව පන්දුවට පහර දුන් ශ්‍රී ලංකා පිල ඕවර 37.5කදී ලකුණු 133ක් රැස් කළ අතර, එම ඉලක්කය හඹා ගිය නැමීබියාවට ඕවර 27කදී සියල්ලන් දැවී රැස් කළ හැකි වූයේ ලකුණු 56ක් පමණි.

ශ්‍රී ලංකා පන්දු බළඇණිය හමුවේ නැමීබියා මුල් පෙළ පිතිකරුවන් 8 දෙනකුටම ලකුණු 10 සීමාවට පිවිසීමට අවස්ථාවක් නොලැබුණු අතර, අංක 10 පිතිකරු ලෙස පිටියට පිවිසි පීටර් ඩැනියෙල් බ්ලයිනවුට් නොදැවී ලකුණු 18ක් රැස් කරමින් ඉනිමේ වැඩිම ලකුණුලාභියා විය. හැන්රෝ බේඩන්හෝස්ට් ලකුණු 11ක් රැස් කළේය. දක්ෂ පන්දු යැවීමක නිරත වූ රුවිෂාන් පෙරේරා ලකුණු 3කට කඩුලු 3ක් බිඳ දැමූ අතර, ඔහුට අනගි සහායක් දෙමින් විශ්ව ළහිරු කඩුලු 3ක්, දිනුර කලුපහන කඩුලු 2ක් සහ ගරුක සංකේත් කඩුල්ලක් දවා ගත්හ.

නැමීබියා පිලේ ආරාධනයෙන් පළමුව පන්දුවට පහරදුන් ශ්‍රී ලංකා ඉනිමේ ආරම්භක පිතිකරු යුගලය ලකුණු 29ක් තුළ දැවී ගියහ. ආරම්භක පිතිකරු පුලිඳු පෙරේරා ලකුණු 3කට දැවී ගිය අතර, නායක සිනෙත් ජයවර්ධනට ඊයේ රැස් කළ හැකි වූයේ ලකුණු 10ක් පමණි.

අංක 3 පිතිකරු ලෙස පිටියට පිවිසි සුපුන් වඩුගේ සෙසු පිතිකරුවන් සමඟ එක්ව ඉනිම ගොඩනැඟූ අතර, ශ්‍රී ලංකා ඉනිම නිමා වන විට ඔහු නොදැවී ලකුණු 56ක් රැස් කර තිබිණි. පන්දු 79කින් ගොඩනැඟුණු ඔහුගේ ඉනිමට හතරේ පහර 6ක් ඇතුළත් විය. 5 වැනි යොවුන් එක්දින තරගයට ක්‍රීඩා කළ සුපුන්ගේ මින්පෙර වාර්තා වූ ඉහළම ඉනිමද ලකුණු 56ක් විය. ශ්‍රී ලංකා ඉනිමේ දෙවැනි වැඩිම ලකුණු සංඛ්‍යාව අතිරේක ලකුණුවලින් සටහන්ව තිබුණේ 25ක් ලෙසිනි. රුසඳ ගමගේ ලකුණු 17ක් සහ ෂාරුජන් ෂන්මුගනාදන් ලකුණු 13ක් ඉනිමට එක් කළහ. පන්දු යැවීමේදී සකේව් වෑන් වූරේන් කඩුලු 4ක් සහ ජොහැන්නස් ඩි විලියර්ස් කඩුලු 3ක් දවා ගත්හ.

ශ්‍රී ලංකා පිල මූලික වටයේ සහභාගි වන අවසන් තරගය මේ ඉරිදා (28) ඔස්ට්‍රේලියාවට එරෙහිව පැවැත්වේ.

ශ්‍රී ලංකා යොවුන් පිල – 133යි. (ඕවර 37.5) සුපුන් වඩුගේ නොදැවී 56, රුසඳ ගමගේ 17, ෂාරුජන් ෂන්මුගනාදන් 13, සිනෙත් ජයවර්ධන 10, අතිරේක 25 (සකේව් වෑන් වූරේන් 23/4, ජොහැන්නස් ඩි විලියර්ස් 19/3)

නැමීබියා යොවුන් පිල – 56යි. (ඕවර 27) පීටර් ඩැනියෙල් බ්ලයිනවුට් නොදැවී 18, හැන්රෝ බේඩන්හෝස්ට් 11 (රුවිෂාන් පෙරේරා 3/3, විශ්ව ළහිරු 19/3, දිනුර කලුපහන 8/2)

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT