Sunday, April 6, 2025
Home » අතුල රණරාජාගෙන් තේරෙන සිංහලෙන් ෆොටෝග්‍රැෆි

අතුල රණරාජාගෙන් තේරෙන සිංහලෙන් ෆොටෝග්‍රැෆි

by sachintha
January 25, 2024 2:08 am 0 comment

දෙස් විදෙස් ඡායාරූපකරන ක්ෂේත්‍රයේ අත්දැකීම් බහුල ප්‍රවීණ ඡායාරූප ශිල්පියෙක් හා ඡායාරූප ශිල්පී උපදේශකවරයෙකු වශයෙන් කටයුතු කරනු ලබන අතුල රණරාජා මහතා විසින් රචිත “තේරෙන සිංහලෙන් ෆොටෝග්‍රැෆි” ග්‍රන්ථය මුල්වරට දොරට වැඩීම හා ජනගත කිරීමේ උත්සවය 20 වන දින සන්ධ්‍යාවේදී කොළඹ, නෙළුම් පොකුණ මාවතේ පිහිටි නව නගර ශාලාවේදී අතිඋත්කර්ෂවත් අන්දමින් පැවැත්විණි.

මෙම අවස්ථාවේදී “තේරෙන සිංහලෙන් ෆොටෝග්‍රැෆි” මුල්ම කෘතිය කතෘ අතුල රණරාජා මහතා ඡායාරූප ක්ෂේත්‍රයට යොමු කළ මුල්ම ගුරුවරයා වන ගුණරත්න දිසානායක මහතාට පිළිගැන්වීම සිදු කෙරිණි.

කෘතිය එළිදැක්වීමේ උත්සවයේ ප්‍රධාන ආරාධිත දේශනය ජ්‍යෙෂ්ඨ ඡායාරූප හා මාධ්‍ය නිර්මාණවේදී අතුල මහවලගේ මහතා විසින් පැවැත්වූ අතර, උත්සවයට පැමිණි පිරිස පිළිගැනීමේ කතාව ආචාර්ය උදිත ගයාශාන් මහතා විසින් පවත්වන ලදී.

මෙම ග්‍රන්ථය ඉතා පැහැදිලිව තේරුම් ගැනීමට හැකිවන අයුරින් සරල සිංහල භාෂාවෙන් රචනා කර තිබෙන බැවින් ඉදිරියේදී ඡායාරූප කරන ක්ෂේත්‍රයට පිවිසෙන නවක ශිෂ්‍ය ශිෂ්‍යාවන්ට හා දැනට ක්ෂේත්‍රයේ නියැළෙන අත්දැකීම් ලබාගනිමින් සිටින අයට බොහෝ සෙයින් ඉවහල් වන ඉතා වටිනා කෘතියක් බව පොත හඳුන්වා දෙමින් ඡායාරූප ශිල්පී උපදේශක ග්‍රන්ථ කර්තෘ අතුල රණරාජා මහතා අදහස් දක්වමින් පැවසීය.

උත්සවයේ ප්‍රධාන ආරාධිතයින් වශයෙන් අති පූජ්‍ය රාජකීය පණ්ඩිත ශාස්ත්‍රපති පෝතියාගම විමලසෝම ස්වාමීන් වහන්සේ, උඩුවරපිටියේ නාරද ස්වාමීන් වහන්සේ ඇතුළු මහා සංඝරත්නය සහ මීගමුව මීසමේ මාරිස් නිකායේ එරික් පෙරේරා කතෝලික සහෝදර තුමන් හා ශ්‍රී ලංකා ඡායාරූප ශිල්පි ක්ෂේත්‍රයේ ප්‍රවීණයන් හා විද්වතුන් වන ප්‍රසන්න හෙන්නායක, චන්ද්‍රසේන පෙරේරා, නාරද අමරතුංග, සරත් පෙරේරා, රංජිත් අබේසිංහ, බන්දු ගුණරත්න, හෙන්රි රාජකරුණා යන මහත්වරුන් සහභාගී වී සිටියේය.

මෙම අවස්ථාවට ඡායාරූප ශිල්පීන් හා ඡායාරූප ශිල්පය හදාරන සිසු සිසුවියන් විශාල ප්‍රමාණයක් හා ක්ෂේත්‍රයේ නියැළෙන සහෘදයින් හා පාඨකයින් විශාල ප්‍රමාණයක් සහභාගී වී සිටියේය.

මෙම ග්‍රන්ථය දිවයින පුරා පොත් හල්වලින් ලබා ගත හැකි බව සංවිධායක මණ්ඩලය වැඩිදුරටත් පැවසීය.

සමීර අබේසිංහ -නුගේගොඩ සමූහ

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT