වසරේ අයිසීසී ලෝක විස්සයි20 කාන්තා ක්‍රිකට් කණ්ඩායමේ නායකත්වයෙන් පිදුම් ලද ශ්‍රී ලංකා ක්‍රීඩිකා චමරි අතපත්තුට ලෝක එක්දින කාන්තා ක්‍රිකට් කණ්ඩායමේ නායකත්වයද ජාත්‍යන්තර ක්‍රිකට් කවුන්සිලය පිරිනමයි. ගෙවීගිය 2023 වසර පුරාවට එක්දින කාන්තා ක්‍රිකට් ක්ෂේත්‍රය විස්මයට පත්කරමින් දස්කම් පෑ ක්‍රීඩිකාවන් 11ක් ජාත්‍යන්තර ක්‍රිකට් කවුන්සිලය හඳුනාගෙන ලෝක එක්දින කණ්ඩායම ඊයේ ප්‍රසිද්ධියට පත් කළේය.
වසරේ අයිසීසී ලෝක ටෙස්ට් ක්‍රිකට් කණ්ඩායමට ශ්‍රී ලංකා හිටපු ටෙස්ට් නායක දිමුත් කරුණාරත්න නම්කොට ඇති අතර, වෙනත් කිසිදු ක්‍රීඩකයකුට ටෙස්ට් හා එක්දින කණ්ඩායමේ ස්ථානයක් හිමිව නැත.
වමත් ආරම්භක පිතිකාරිනී චමරි අතපත්තු දිගු කලක් ශ්‍රී ලංකා පිලේ පිතිකරණයේ ආරම්භක භූමිකාව ඉටු කළ අතර, ඇය පසුගිය වසරේ ජාත්‍යන්තර එක්දින තරග 8කදී ලකුණු 415ක් රැස් කරමින් සාමාන්‍ය 69.16ක් රඳවා ගත්තාය. ගාල්ල ජාත්‍යන්තර ක්‍රීඩාංගණයේදී නවසීලන්තයට එරෙහි පළමු තරගයේදී පන්දු 83කදී හයේ 5ක් හා හතරේ 19ක් සමඟ නොදැවී ලකුණු 108ක් ලැබීම හා එම තරගාවලියේ අවසන් තරගයේදී පන්දු 80කදී හයේ පහර 9ක් හා හතරේ පහර 13ක් සමඟ නොදැවී ලකුණු 140ක් ලැබීම චමරි අතපත්තුගේ කැපී පෙනෙන ඉනිම දෙකක් විය.
වසරේ අයිසීසී ලෝක ටෙස්ට් ක්‍රිකට් කණ්ඩායමේ ආරම්භක පිතිකරුවකු ලෙස නම් කොට ඇති දිමුත් කරුණාරත්න පසුගිය වසරේ ටෙස්ට් තරග 6කට ක්‍රීඩා කළ අතර, එහිදී ශතක 2ක් හා අර්ධ ශතක 3ක් සමඟ ලකුණු 608ක් රැස් කළේය. අයර්ලන්තයට එරෙහිව ගාල්ල ජාත්‍යන්තර ක්‍රිකට් ක්‍රීඩාංගණයේදී ඔහු ලකුණු 179ක් හා ලකුණු 115ක් රැස් කිරීමට සමත් විය.
අයිසීසී ලෝක එක්දින පිරිමි ක්‍රිකට් කණ්ඩායමේ නායකත්වයට ඉන්දියාවේ රෝහිත් ෂර්මා නම් කොට ඇති අතර, විරාත් කෝලි, ශුබ්මන් ගිල්, මොහොමඩ් සිරාජ්, කුල්දීප් යාදෙව් හා මොහොමඩ් ෂාමි ඇතුළුව ඉන්දීය ක්‍රීඩකයන් හය දෙනකු ඇතුළත්වීම විශේෂත්වයකි.
අයිසීසී ලෝක ටෙස්ට් ක්‍රිකට් කණ්ඩායමට ලෝක ටෙස්ට් ශූරතාවලිය දිනා ගැනීමට නායකත්වය දුන් පැට් කමින්ස් ඇතුළු ඔස්ට්‍රේලියානු ක්‍රීඩකයන් 5ක් නම් කොට ඇති අතර, අනෙක් ක්‍රීඩකයන් වන්නේ උස්මාන් කවාජා, ට්‍රැවිස් හෙඩ්, ඇලෙක්ස් කෙරී හා මිචෙල් ස්ටාක් වේ.
අයිසීසී ලෝක එක්දින කාන්තා ක්‍රිකට් කණ්ඩායම: චමරි අතපත්තු – නායිකා (ශ්‍රී ලංකාව), පොහෙබ් ලිච්ෆීල්ඩ් (ඔස්ට්‍රේලියාව), එලියස් පෙරී (ඔස්ට්‍රේලියාව), අමෙලියා කර්ර් (නවසීලන්තය), බෙත් මොනී – කඩුලු රකින්නිය (ඔස්ට්‍රේලියාව), නැට් සිවර් බ්‍රන්ට් (එංගලන්තය), ආෂ් ගාඩ්නර් (ඔස්ට්‍රේලියාව), ඇනබල් සදර්ලන්ඩ් (ඔස්ට්‍රේලියාව), නැඩීන් ඩී ක්ලේක් (දකුණු අප්‍රිකාව), ලියා තාහූ (නවසීලන්තය), නහිඩා අක්ටර් (බංග්ලාදේශය).
අයිසීසී ලෝක එක්දින පිරිමි ක්‍රිකට් කණ්ඩායම: රෝහිත් ෂර්මා – නායක (ඉන්දියාව), ශුබ්මන් ගිල් (ඉන්දියාව), ට්‍රැවිස් හෙඩ් (ඔස්ට්‍රේලියාව), විරාත් කෝලි (ඉන්දියාව), ඩැරල් මිචෙල් (නවසීලන්තය), හෙන්රික් ක්ලාසන් – කඩුලු රකින්නා (දකුණු අප්‍රිකාව), මාර්කෝ ජැන්සෙන් (දකුණු අප්‍රිකාව), ඇඩම් සම්පා (ඔස්ට්‍රේලියාව), මොහොමඩ් සිරාජ් (ඉන්දියාව), කුල්දීප් යාදෙව් (ඉන්දියාව), මොහොමඩ් ෂාමි (ඉන්දියාව).
අයිසීසී ලෝක ටෙස්ට් ක්‍රිකට් කණ්ඩායම: පැට් කමින්ස් – නායක (ඔස්ට්‍රේලියාව), උස්මාන් කවාජා (ඔස්ට්‍රේලියාව), දිමුත් කරුණාරත්න (ශ්‍රී ලංකාව), කේන් විලියම්සන් (නවසීලන්තය), ජෝ රූට් (එංගලන්තය), ට්‍රැවිස් හෙඩ් (ඔස්ට්‍රේලියාව), රවීන්ද්‍ර ජඩේජා (ඉන්දියාව), ඇලෙක්ස් කෙරී – කඩුලු රකින්නා (ඔස්ට්‍රේලියාව), රවිචන්ද්‍ර අස්වින් (ඉන්දියාව), මිචෙල් ස්ටාක් (ඔස්ට්‍රේලියාව), ස්ටුවට් බ්‍රෝඩ් (එංගලන්තය).
ප්‍රින්ස් ගුණසේකර
