Sunday, April 6, 2025
Home » ඇෆ්ගනිස්තානය ශ්‍රී ලංකාවේ හිටපු පන්දු රැකීමේ පුහුණුකරු උස්සයි
මෙරටට එන්න දින 7කට කලින්ම වැඩ අරඹලා

ඇෆ්ගනිස්තානය ශ්‍රී ලංකාවේ හිටපු පන්දු රැකීමේ පුහුණුකරු උස්සයි

by sachintha
January 24, 2024 1:04 am 0 comment

ශ්‍රී ලංකාවේ සංචාරය කිරීමට තවත් දින 7ක කාලයක් තිබියදී ඇෆ්ගනිස්තාන ක්‍රිකට් පිල ශ්‍රී ලංකා කණ්ඩායමේ හිටපු පන්දු රැකීමේ පුහුණුකරු ෂේන් මැක්ඩර්මොට් මහතා තම කණ්ඩායමට බඳවා ගනියි. ඇෆ්ගනිස්තාන ක්‍රිකට් කණ්ඩායම ශ්‍රී ලංකාවේදී එක් ටෙස්ට් තරගයකට, එක්දින තරග තුනකට සහ විස්සයි20 තරග 3කට ක්‍රීඩා කිරීමට නියමිතව ඇති අතර මේ මස 31 දා ශ්‍රී ලංකාවට පැමිණීමට නියමිතය.

ශ්‍රී ලංකාවේ ක්‍රීඩාංගණ හා තණතිලි පිළිබඳ මනා අත්දැකීම්ක් ඇති ෂේන් මැක්ඩර්මොට් දැනට ඔස්ට්‍රේලියාවේ සිටින අතර, ඇෆ්ගනිස්තාන ක්‍රිකට් පිල සමඟ පෙබරවාරි 1 දා ශ්‍රී ලංකාවේදී එක්වීමට නියමිතය. 43 හැවිරිදි මැක්ඩර්මොට් වසර 2ක් බංග්ලාදේශ ක්‍රිකට් කණ්ඩායමේ පන්දු රැකීමේ පුහුණුකරු ලෙස කටයුතු කළ අතර, දකුණු ඔස්ට්‍රේලියාව, බටහිර ඔස්ට්‍රේලියාව සහ තස්මේනියා ක්‍රිකට් කණ්ඩායම් සමඟ ඉහළ කාර්ය සාධන පුහුණුකරුවෙක් ලෙස කටයුතු කළේය.

ඇෆ්ගනිස්තාන ජාතික කණ්ඩායමේ නව පන්දු රැකීමේ පුහුණුකරු ලෙස ෂේන් මැක්ඩර්මොට්ගේ පත් කිරීම ඇෆ්ගනිස්තාන ක්‍රිකට් මණ්ඩලය ඊයේ සනාථ කළ අතර, හිටපු පුහුණුකරු දකුණු අප්‍රිකාවේ රෙයන් මාරොන් වෙනුවට මේ බඳවා ගැනීම සිදුවන බව නිවේදනය කළේය.

ඇෆ්ගනිස්තාන ක්‍රිකට් පාලක මණ්ඩලය තම කණ්ඩායමේ පුහුණුකරුවන් සියලු දෙනා විදේශීය පුහුණුකරුවන්ගෙන් සමන්විත කොට ඇත. පුහුණු කාර්ය මණ්ඩලයට ජොනතන් ට්‍රොට් (ප්‍රධාන පුහුණුකරු), ඇන්ඩෘ පුටික් (පිතිකරණ පුහුණුකරු), හමීඩ් හසන් (පන්දු යැවීමේ පුහුණුකරු), ෂේන් මැක්ඩර්මොට් (පන්දු රැකීමේ පුහුණුකරු) සහ ප්‍රසාන්ත් පංචාද (ශාරීරික යෝග්‍යතා පුහුණුකරු) ශ්‍රී ලංකා සංචාරයේදී ක්‍රියා කරනු ඇත.

ශ්‍රී ලංකා – ඇෆ්ගනිස්තාන පළමු ටෙස්ට් ක්‍රිකට් තරගය පෙබරවාරි 2 සිට 6 දක්වා එස්එස්සී පිටියේ පැවැත්වෙන අතර පෙබරවාරි 9, 11 හා 14 දිනවල පල්ලෙකැලේ ක්‍රීඩාංගණයේදී දිවා – රාත්‍රි එක්දින තරග තුනත්, පෙබරවාරි 17, 19, හා 21 දිනවල රංගිරි දඹුලු ජාත්‍යන්තර ක්‍රීඩාංගණයේ රාත්‍රි කාලයේ විස්සයි20 තරග 3ත් පැවැත්වීමට කටයුතු යොදා ඇත.

ප්‍රින්ස් ගුණසේකර

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT