සමාජ මාධ්‍ය පුළුල් වීමත් සමඟ ජනතාව වෙත සත්‍ය තොරතුරු ගලා යෑම වැඩි වූ බවත් ඇතැම් අවස්ථාවලදී සිදු නොවිය යුතු දේවල්ද සමාජ මාධ්‍ය ඔස්සේ සිදු වන බවත් ජාතික ජන බලවේගයේ නායක, පාර්ලිමේන්තු මන්ත්‍රී අනුර කුමාර දිසානායක මහතා පාර්ලිමේන්තුවේදී ඊයේ (23) ප්‍රකාශ කළේය.
පාර්ලිමේන්තු මන්ත්‍රී අනුර කුමාර දිසානායක මහතා මේ බව සඳහන් කළේ සමාජ ආරක්ෂණ පනත් කෙටුම්පත සම්බන්ධයෙන් පාර්ලිමේන්තුවේදී ඊයේ (23) පැවති විවාදයේදීය.
එහිදි වැඩිදුරටත් අදහස් දැක්වූ පාර්ලිමේන්තු මන්ත්‍රී අනුර කුමාර දිසානායක මහතා මෙසේද පැවසීය.
කෙසේ වුවද මේ වන විට ආණ්ඩුවට සමාජ මාධ්‍ය හිසරදයක් වී ඇති බැවින් ඒවා මර්දනය කර ගැනීමේ අවශ්‍යතාවක් තිබෙනවා.
ඇත්තටම මේ පනත අපේ රටේ විශාල ආන්දෝලනයකට තුඩු දීලා තියෙනවා. අපේ රටේ මාධ්‍ය බොහෝ කාලයක් තිබුණේ අයිතිකරුවන් කිහිප දෙනකු අතේ. මේ රටේ තොරතුරු ජනතාව අතරට ගියේ ඔවුන්ගේ අභිමතය පරිදි. ඒ අනුව ජනතාව වෙත ගියේ පෙරන ලද තොරතුරු. සමාජ මාධ්‍ය පුළුල් වීමත් සමඟ ඇත්ත තොරතුරු ගලා යන මාධ්‍යයක් ලෙස සමාජ මාධ්‍ය උපයෝගී වුණා. නාරම්මල වෙඩි තැබීම පිළිබඳ සිදුවීම සමාජ මාධ්‍යයෙන් නොගියා නම් එය පොලිසිය විසින් ගොතන ලද පුවතක් අනුව මිය ගිය තැනැත්තා වැරදි කරු බවට පත්වීමට ඉඩ තිබුණා. සමාජ මාධ්‍ය ජනතාව වෙත තොරතුරු ගෙන යෑම වෙනුවෙන් විශාල කාර්ය භාරයක් ඉටුකරනවා.
