පොලිස් කොස්තාපල්වරයෙකු ගමන් කළ යතුරුපැදියක් පාලනය කර ගත නොහැකිව මාර්ගයෙන් ඉවතට පැන, 15 හැවිරිදි දැරියකගේ ඇඟේ ගැටී සිදු වූ අනතුරකින් එම කොස්තාපල්වරයා සහ මාර්ගය අසල රැඳී සිටි දැරිය තුවාල ලබා ගල්නෑව රොහලට ඇතුළත් කළ බව ගල්නෑව පොලිසිය පවසයි.
මෙලෙස තුවාල ලබා ඇත්තේ ගල්කිරියාගම පොලිසියට අනුයුක්තව රාජකාරිය කළ, එප්පාවල කටියාව ප්‍රදේශයේ පදිංචි කොස්තාපල්වරයෙකු සහ ගල්නෑව ජය මාවතේ පදිංචිව සිටි 15 හැවිරිදි දැරියකි. මෙම කොස්තාපල්වරයා රාත්‍රී රාජකාරියට වාර්තා කිරීම සඳහා ගල්කිරියාගම පොලිසියට ගමන් කරමින් සිටියදී, ඉකුත් 19දා පස්වරුවේදී ගල්නෑව නගරය පසු කර මීටර් 500ක් පමණ ගමන් කිරීමේදී යතුරුපැදිය පාලනය කර ගත නොහැකිව මාර්ගයෙන් ඉවතට පැන ඇති බව පොලිසිය කියයි.
එම අවස්ථාවේ යතුරු පැදිය මාර්ගයේ වම් පස වැලි තීරුව අයිනේ නැවතී සිටි දැරියගේ ගැටී මෙම අනතුර සිදුව තිබේ.
මෙම අනතුර සම්බන්ධයෙන් ගල්නෑව පොලිසියේ නිලධාරීහු පිරිසක් වැඩිදුර විමර්ශන සිදු කරති.
