2023 වසරේ සිට නොමිලේ විදුලිය ලබාදීම අත්හිටුවා ඇති බැවින් අමතර ලෙස රුපියල් මිලියන 57ක් විදුලි බලය සහ වැටුප් ගෙවීම සඳහා අවශ්‍ය බව ටවර්හෝල් අධ්‍යක්ෂ ජනරාල් ඩී.එම්.එස්. දිසානායක මහතා පවසයි.
2024 වසර අභියෝගාත්මක වසරක් බව පෙන්වා දුන් ටවර්හෝල් රඟහල පදනමේ අධ්‍යක්ෂ ජනරාල්වරයා ආයතනයේ 2024 වසර සඳහා අපේක්ෂිත ආදායම සහ වියදම යන ද්විත්වයම රු. මිලියන 169.5ක් බව ද පැවසීය. ටවර්හෝල් රඟහල 1992 වසරේ සිට විදුලි ගාස්තු ගෙවීමෙන් නිදහස් කර තිබුණ ද 2023 වසරේ සිට විදුලි බලය සඳහා ගෙවීම් කිරීමට සිදුව ඇති බැවින් අමතර මිලියන 57ක මුදල් ප්‍රමාණයක් විදුලි බලය සඳහා සහ වැටුප් ගෙවීම සඳහා යොදා ගැනීමට සිදුව ඇති බව ද අධ්‍යක්ෂ ජනරාල්වරයා පෙන්වා දුන්නේය. මේ අනුව එම මුදල් පදනම විසින් උපයාගත යුතු බවත් වැඩිදුරටත් පෙන්වා දුන්නේය.
පාර්ලිමේන්තු මන්ත්‍රී ලලිත් වර්ණකුමාර මහතාගේ සභාපතිත්වයෙන් පසුගියදා පාර්ලිමේන්තුවේදී රැස්වූ මාධ්‍ය, තාරුණ්‍ය, උරුමය හා නූතන පුරවැසියා පිළිබඳ ආංශික අධීක්ෂණ කාරක සභාවේදී ටවර්හෝල් රඟහල පදනමේ ඉදිරි කටයුතු පිළිබඳ සාකච්ඡා විය.
ටවර්හෝල් රඟහල පදනම මඟින් ක්‍රියාත්මක කරනු ලබන නාට්‍ය හා රංගකලා පාසලේ කටයුතු පිළිබඳව ද අවධානය යොමු විය. මේ වන විට දමිළ මාධ්‍යයෙන් ද පාඨමාලාවක් ආරම්භ කිරීමට හැකි වීමත් එය යාපනය ඇතුළු ප්‍රදේශවල වඩාත් ජනප්‍රිය වී ඇති බවත් පෙන්වා දුන්නේය. මෙම පාඨමාලා ඇතුළු පදනමේ කටයුතු සම්බන්ධයෙන් විධිමත් ලෙස ප්‍රධාන මාධ්‍ය සහ සමාජ මාධ්‍ය ඔස්සේ ප්‍රචාරණය ලබා දීමේ අවශ්‍යතාව ද මෙහිදී සාකච්ඡා විය. එහිදී මෙම රැස්වීමට සහභාගි වූ තරුණ නියෝජිතයන් ද අදහස් දැක්වූ අතර ඔවුන්ගේ සහාය ලබා ගැනීමට අපේක්ෂා කරන බව ද නිලධාරීහු පැවසූහ.
ටවර්හෝල් රඟහල පදනමට අයත් සව්සිරිපාය ගොඩනැඟිල්ලට අදාළව කර්මාන්ත සංවර්ධන අධිකාරිය (CIDA) සමඟ පැවති ගිවිසුම 2016 වසරේ අවසන් වුවද මේ වන තෙක් කිසිදු ගෙවීමකින් තොරව ඉදිකිරීම් එම අධිකාරිය රැඳී සිටීම සම්බන්ධයෙන් ද මෙහිදී අවධානය යොමු විය. මේ හේතුවෙන් ආයතනයට ආදායමක් ලැබීමට ඇති අවස්ථාව මඟහැරී ඇති බව ද ටවර්හෝල් පදනමේ නිලධාරීහු පෙන්වා දුන්හ. මේ සම්බන්ධයෙන් නාගරික සංවර්ධන හා ඉදිකිරීම් අමාත්‍යවරයාගේ අවධානයට යොමු කරන බව කාරක සභා සභාපති පාර්ලිමේන්තු මන්ත්‍රී ලලිත් වර්ණකුමාර මහතා පැවසීය.
ටවර්හෝල් පදනම මඟින් සංවිධානය කරනු ලබන සමස්ත ලංකා පාසල් නාට්‍ය තරගාවලියේදී රංගනයට අමතරව නිෂ්පාදන කටයුතු සියල්ල සිදු කිරීමට ද සිසු දරු දැරියන්ට ඉදිරි තරගාවලියේ සිට අවස්ථාව ලබා දීමට තීරණය කර ඇති බව ද මෙහිදී අනාවරණය විය. මීට අමතරව ජාතික ලේඛනාරක්ෂක දෙපාර්තමේන්තුවේ වත්මන් කටයුතු සහ ඉදිරි සැලසුම් පිළිබඳව ද මෙහිදී අවධානය යොමු විය.
පාර්ලිමේන්තු මන්ත්‍රීවරුන් වන ජගත් කුමාර සුමිත්‍රාආරච්චි, නාලක බණ්ඩාර කෝට්ටගොඩ, සංජීව එදිරිමාන්න යන මහත්වරු ද බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම් සෝමරත්න විදානපතිරණ මහතා ඇතුළු ටවර්හොල් රඟහල පදනම සහ ජාතික ලේඛනාරක්ෂක දෙපාර්තමේන්තුව නියෝජනය කරමින් නිලධාරීහු පිරිසක් ද මෙම අවස්ථාවට එක්ව සිටියහ.
