සංචාරක සිම්බාබ්වේ පිලට එරෙහි අවසන් තරගයේ පන්දු රැකීම, පන්දුවට පහරදීම හා පිතිකරණය යන අංශ තුනේම සාර්ථකතවය හේතුවෙන් මාස 30කට පසුව විස්සයි20 තරගාවලියක් දිනා ගැනීමේ වාසනාව ශ්‍රී ලංකාව සතු විය. ශ්‍රී ලංකාව අවසන් වරට විස්සයි20 ද්විපාර්ශ්වික තරගාවලියක ජය සටහන් කොට තිබුණේ ඉන්දියාවට එරෙහිව 2021 වසරේ ජූලි මාසයේදීය.
කොළඹ ආර්. ප්‍රේමදාස ක්‍රීඩාංගණයේ ඊයේ විදුලි ආලෝක ධාරා මැද පැවති තෙවැනි හා අවසන් විස්සයි20 තරගයෙන් ශ්‍රී ලංකා පිල තවත් පන්දු 55ක් ඉතිරිව තිබියදී කඩුලු 9ක ජයක් වාර්තා කළ අතර, ඒ සමඟ තරග තුනකින් සමන්විත විස්සයි20 තරගාවලිය 2-1ක් ලෙස ජය ගැනීමට සමත් වූවේය. 
කාසියේ වාසිය දිනාගත් ශ්‍රී ලංකා පිල මුලින් පන්දුවට පහරදීමට සිම්බාබ්වේ පිලට ආරාධනා කළ හෙයින් ඕවර 14.1ක් තුළදී සියලු දෙනා ලකුණු 82කට දවා ගත්තේය. එම පහසු ඉලක්කය කඩුල්ලක් දැවී පසු කිරීමට ශ්‍රී ලංකා ක්‍රීඩකයෝ සමත් වුහ.
අවසන් තරගයේ වීරයා සම්මානය නායක වනිඳු හසරංග දිනාගත් අතර, වසර 3කට පසු ශ්‍රී ලංකා විස්සයි20 කණ්ඩායමට එක් වූ ඇන්ජලෝ මැතිව්ස් තරගාවලියේ වීරයා සම්මානය දිනා ගත්තේය.
ශ්‍රී ලංකා ආරම්භක පිතිකරු යුගලය වු පැතුම් නිශ්ශංක හා කුසල් මෙන්ඩිස් පළමු කඩුල්ලට ලකුණු 64ක සබඳතාවක් ගොඩනැඟූහ. කුසල් මෙන්ඩිස් පන්දු 27කදී හයේ පහරක් හා හතරේ පහර 4ක් සමඟ ලකුණු 33ක් ලබා සිටියදී දැවීගිය අතර, පැතුම් නිශ්ශංක හයේ පහරක් හා හතරේ පහර 5ක් සමඟ නොදැවී ලකුණු 39ක් වාර්තා කළේය. කලකට පසු විස්සයි20 පිටියට පිවිසි ධනංජය ද සිල්වා පන්දු 15කදී හතරේ 2ක් සමඟ නොදැවී ලකුණු 15ක් ලබා සිටියේය.
මැතිව්ස්ගේ පළමු ඕවරයේ දෙවැනි පන්දුවේදී ක්‍රෙග් අර්වින් එල්ල කළ පහරක් වේගයෙන් පොයින්ට් දෙසින් ඇදී යද්දී සදීර සමරවික්‍රම අනගි උඩ පන්දුවක් රැක ගැනීමෙන් සිම්බාබ්වේ පළමු කඩුල්ල දවා ගැනීමට හැකිවූ අතර, ඩිල්ෂාන් මධුසංඛගේ දෙවැනි ඕවරයේදී බ්‍රයන් බෙනෙට් පිට පිට හතරේ පහර 4ක් එල්ල කිරිමෙන් ලකුණු වේගය ඕවරයකට 14 දක්වා ඉහළ ගියේය. එහෙත් මැතිව්ස්ගේ ඊළඟ ඕවරයේදී පන්දු 12කදී හතරේ 7ක් සමඟ ලකුණු 29ක් ලැබූ බෙනෙට් දවා ගැනීමට මැතිව්ස් සමත් විය.
සිම්බාබ්වේ ප්‍රහාරක පිතිකරු නායක සිකන්දර් රාසා ලකුණු 10ක් ලබා සිටියදී වේග පන්දු යවන ඩිල්ෂාන් මධුෂංකගේ පන්දුවකට ‘ඩීප් තර්ඩ් මෑන්’ වෙතට එල්ල කළ උඩ පන්දුව මහීෂ් තීක්ෂණ රැක ගැනීමෙන් ලකුණු ලබා ගැනීමේ වේගය පහත වැටිණි. සිම්බාබ්වේ ඉනිමේ අවසන් කඩුලු 7ක් ලකුණු 18ක් තුළ දවා ගැනීමට ශ්‍රී ලංකා පිල සමත් වූ අතර, දෙවැනි තරගයේ වීරයා වෙමින් සතර අතට පහර එල්ල කළ ලූක් ජොන්ග්වේ පාලනය කර ගැනීමට හසරංග සමත්වීමෙන් ශ්‍රී ලංකාව පැත්තට තරගය හැරවිණි. ජොන්ග්වේ ලකුණු 2ක් ලබා සිටියදී වේගවත් ‘ස්විප් පහරක්’ එල්ල කළ අතර, ‘බැක්වර්ඩ් ස්කුවෙයාර් ලෙග්’ හී සිටි මධුෂංක එය ඉදිරියට දිවවිත් උඩ පන්දුවක් බවට පරිවර්තනය කර ගත්තේය. එවිට සිම්බාබ්වේ ලකුණු පුවරුව කඩුලු 7කට ලකුණු 76ක් විය.
හසරංගගේ පස්වැනි හා හයවැනි පන්දු දෙකේදී මැසකඩ්සාගේ හා නගරාවාගේ කඩුලු දෙකම පිට පිට දවා ගැනීමට සමත්වීමෙන් සිම්බාබ්වේ පහළ මට්ටමට ඇද වැටිණි. ආර්. ප්‍රේමදාස පිටියේ ඛෙත්තාරාම අන්තයෙන් ඊළඟ ඕවරය ආරම්භ කළ මහීෂ් තීක්ෂණ පළමු පන්දුවේදීම ක්ලයිව් මඩන්ඩේගේ කඩුල්ල බිඳ හෙළීමෙන් සිම්බාබ්වේ ඉනිම නිමාවට පත් විය. වනිඳු හසරංග කඩුලු 4ක් බිඳ හෙළාගත් අතර, මැතිව්ස් හා තීක්ෂණ කඩුලු දෙක බැගින් ලබා ගත්හ.
ඡායාරූප – සුදත් නිශාන්ත
