ජාත්‍යන්තර විස්සයි20 ක්‍රිකට් පිටියේ පළමු වරට දෙවරක් ක්‍රියාත්මක වූ සුපිරි ඕවර සටනකින් පසු සංචාරක ඇෆ්ගනිස්තාන කණ්ඩායමට එරෙහිව තෙවැනි විස්සයි20 තරගය ජය ගැනීමට ඉන්දියාව සමත් විය. මේ සමඟ තරග 3කින් සමන්විත විස්සයි20 තරගාවලිය ද 3-0කින් ජය ගැනීමට ඉන්දියාවට හැකි විය.
බැංගලෝර්හිදී පැවති තරගයේ පළමුව පන්දුවට පහර දුන් ඉන්දීය පිල කඩුලු 4ක් දැවී ලකුණු 212ක් රැස් කළ අතර, පිළිතුරු ඉනිම ක්‍රීඩා කළ ඇෆ්ගනිස්තානය ද කඩුලු 6ක් දැවී ලකුණු 212ක් වාර්තා කිරීමට සමත් විය. මේ හේතුවෙන් ක්‍රියාත්මක වූ සුපිරි ඕවරයේදී දෙපිලම ලකුණු 16 බැගින් රැස් කිරීම හේතුවෙන් දෙවැනි වරටත් සුපිරි ඕවරය ක්‍රියාත්මක කිරීමට සිදු විය. එහිදී ඉන්දියාව ලකුණු 11ක් රැස් කළ අතර, ඇෆ්ගන් පිලට රැස් කළ හැකි වූයේ එක් ලකුණක් පමණි.
මේ තරගය විස්සයි20 පිටියේදී සුපිරි ඕවර 2ක් ක්‍රියාත්මක කළ දෙවැනි තරගය බවට පත්වූ අතර, මින් පෙර 2020 අයිපීඑල් තරගාවලියේදී මුම්බායි ඉන්දියන්ස් සහ පන්ජාබ් කිංග්ස් අතර සුපිරි ඕවර 2ක් ක්‍රියාත්මක වී තිබේ. මේ තරගයේදී ඉන්දීය නායක රෝහිත් ශර්මා පන්දු 69කදී නොදැවී ලකුණු 121ක් වාර්තා කළ අතර, ඊට හතරේ පහර 11ක් සහ හයේ පහර 8ක් එක් විය. ඔහු රින්කු සිං සමඟ පස්වැනි කඩුල්ලට ලකුණු 190ක නොබිඳුණු සබඳතාවක් ගොඩනැඟීමට සමත් වූ අතර, එම සබඳතාව ඉන්දියාව වෙනුවෙන් විස්සයි20 තරගයක ඕනෑම කඩුල්ලක් වෙනුවෙන් ගොඩනැඟූ ඉහළම සබඳතාව බවට ද පත් විය. ශර්මා මේ තරගයේදී රැස් කළේ 5 වැනි ජාත්‍යන්තර විස්සයි20 ශතකය වන අතර, ඒ සමඟ ජගත් විස්සයි20 පිටියේ වැඩිම ශතක සංඛ්‍යාවක් රැස් කළ පිතිකරු බවට ද ඔහු පත්විය. ඇෆ්ගන් පිල වෙනුවෙන් රහ්මනුල්ලා ගුර්බාස් (50), ඉබ්‍රහීම් සද්‍රාන් (50) සහ ගුල්බඩීන් නයිබ් (55) අර්ධ ශතක රැස් කළහ.
