අන්තර සමාජ පළමු පෙළ ලීග් රග්බි තරගාවලියේ මූලික වටයේ අවසන් තරග අද (19) ආරම්භ වේ. කණ්ඩායම් අටක් තරග වදින ලීග් රග්බි පිටියේ මේ වනවිට තරග 6ක් අවසන් වී ඇති අතර, කුසලාන වටයට සුදුසුකම් ලැබූ ප්‍රසාද ලකුණු සටහනේ මුල් කණ්ඩායම් 4 මේ වනවිටත් තහවුරු වී තිබේ.
මූලික වටයේ අවසන් තරග ආරම්භ කරමින් අද පස්වරු මේ හැව්ලොක් පිටියේදී ශ්‍රී ලංකා නාවික හමුදා ක්‍රීඩා සමාජය සහ හැව්ලොක්ස් ක්‍රීඩා සමාජය අතර තරගය පැවැත්වේ. නාවික හමුදා පිල මේ වන විට ප්‍රසාද ලකුණු සටහනේ අටවැනි තැන පසුවන අතර, හැව්ලොක්ස් පිල සිව්වැනි ස්ථානයේ රැඳී සිටී.
පලඟ ශූරතා වටයට එක්වී සිටින පොලිස් ක්‍රීඩා සමාජය සහ ගුවන් හමුදා ක්‍රීඩා සමාජය හෙට (20) පස්වරුවේ පොලිස් පිටියේදී තරග වදින අතර, කුසලාන වටයට එක් වූ සීඑච් ඇන්ඩ් එෆ්සී ක්‍රීඩා සමාජය සහ පලඟ වටයට පිවිස සිටින යුද හමුදා ක්‍රීඩා සමාජය අතර තරගය ද එදිනම පස්වරුවේ පනාගොඩ දී පැවැත්වේ.
තරගාවලියේ අපරාජිත කණ්ඩායම් වන මහනුවර ක්‍රීඩා සමාජය සහ සීආර් ඇන්ඩ් එෆ්සී ක්‍රීඩා සමාජය අනිද්දා (21) පස්වරුවේ නිත්තවෙලදී තරග වැදීමට නියමිතය.
