මහජන ආරක්ෂක ඇමති ටිරාන් අලස් මහතාගේ හා වැඩ බලන පොලිස්පති දේශබන්දු තෙන්නකෝන් යන මහත්වරුන් ගේ උපදෙස් මත ක්‍රියාත්මක යුක්තිය මෙහෙයුමට මසක් සම්පූර්ණ වීම නිමිත්තෙන් ආරක්ෂක අංශ නිලධාරීන්ට සෙත් පතා පැවති ආශිර්වාදාත්මක පින්කමක් හෝමාගම සුගත බිම්බාරාම විහාරස්ථානයේදී (17) දා පැවැත්වුණි.
හෝමාගම සුගත බිම්බාරාම විහාරාධිපති විද්‍යාවර්ධන පිරිවෙනේ කෘත්‍යාධිකාරි පානළුවේ පඤ්ඤාරාම නා හිමියන්ගේ උපදෙස් මත විහාරස්ථ දායක සභාව හා ප්‍රදේශවාසීන් එක්ව මෙම පිංකම සංවිධානය කර තිබුණි. එහිදී සහකාර පොලිස් අධිකාරී වෙදමුල්ල මහතා හා හෝමාගම මූලස්ථාන පොලිස් පරීක්ෂක ප්‍රණීත් මානවඩු මහතා ඇතුළු නිලධාරීන් හෝමාගම නගරයේ සිට මල් පෙරහරකින් පුද පූජා ද්‍රව්‍ය වැඩම කරවීමෙන් අනතුරුව බෝධි පූජා පින්කම හා සෙත් පිරිත් දේශනාව පැවැත්වුණි. මෙහිදී අටවිසි බෝධි පූජා පින්කම හෝමාගම විද්‍යාවර්ධන පිරිවෙනේ නියෝජ්‍ය පරිවේනාධිපති ශාස්ත්‍රපති කීනගොඩ සුදස්සී හිමියන් විසින් මෙහෙයවනු ලැබීය. මෙම අවස්ථාවට හෝමාගම සහකාර පොලිස් අධිකාරී වෙදමුල්ල, මූලස්ථාන පොලිස් පරීක්ෂක ප්‍රණීත් මානවඩු, ප්‍රධාන පොලිස් පරීක්ෂක කාරියවසම්, ප්‍රජා පොලිස් ඒකකයේ ස්ථානාධිපති අජන්ත ප්‍රභාකර, උප පොලිස් පරීක්ෂක චන්ද්‍රසේකර, උප පොලිස් පරීක්ෂක ජයතිස්ස, මහතා ඇතුළු නිලධාරීහු සහභාගීවී සිටියහ.
