රුපියල් 11,500 (එකොළොස්දාස් පන්සීයක) ව්‍යාජ මුදල් නෝට්ටු තොගයක් සන්තකයේ තබාගෙන සිටි පුද්ගලයෙක් පෙරේදා (17) රාත්‍රී නල්ලතන්නිය නගරයේදී සැකපිට අත්අඩංගුවට ගත් බව නල්ලතන්නිය පොලිස් ස්ථානාධිපති ප්‍රධාන පොලිස් පරීක්ෂක ශාන්ත වීරසේකර මහතා පැවසීය.
මෙසේ අත්අඩංගුවට ගෙන ඇත්තේ, වලස්මුල්ල ප්‍රදේශයේ පදිංචි 45 හැවිරිදි කුලී වෑන් රථ රියැදුරෙකි.
සැකකරු මැදමුලන ප්‍රදේශයේ වන්දනාකරුවන් පිරිසක් සමඟ පෙරේදා (17) දින රාත්‍රියේ නල්ලතන්නිය ප්‍රදේශයට පැමිණ වන්දනා නඩය ශ්‍රි පාද මළුව කරා යාමෙන් පසු සැකකරු සැකකටයුතු ලෙස නල්ලතන්නිය නගරයේ සැරිසරන අවස්තාවේ වෙළෙසල් හිමියෙකු විසින් සැකකරු සම්බන්ධයෙන් ලබාදුන් තොරතුරක් මත වහා ක්‍රියාත්මක වු නල්ලතන්නිය පොලිසියේ නිලධාරින් රියැදුරා අත්අඩංගුවට ගෙන පරික්ෂා කිරිමේදී සැකකරුගේ මුදල් පසුම්බියේ තිබි රුපියල් දහසේ ව්‍යාජ නොට්ටු 11ක් සහ ව්‍යාජ රුපියල් 500 එක් නෝට්ටුවක් සොයා ගත් බව පොලිසිය පවසයි.
වෑන් රථයෙන් කුලි පදනම මත පිරිසක් ප්‍රවාහනය කළ අවස්තාවේ තම වෑන් රථයේ ගමන් ගත් පිරිස විසින් එම මුදල් නොට්ටු තමන්ට ලබාදුන් බවත්, එම මුදල් ව්‍යාජ නොට්ටු බව තමන් නොදන්නා බව රියැදුරා විසින් පොලිසියට ප්‍රකාශ කළ බවයි පොලිස් ස්ථානාධිපතිවරයා පවසා සිටියේ.
අත්අඩංගුවට ගෙන ඇති සැකකරු හා ව්‍යාජ මුදල් නෝට්ටු තොගය හැටන් දිසා මහේස්ත්‍රාත් අධිකරණය හමුවට පැමිණවීමට නියමිත බව පොලිස් ස්ථානාධිපතිවරයා වැඩිදුරටත් පැවසීය.
