සමාජ මාධ්‍යයෙන් පෙන්වන තරම් ජනතාවක් ජාතික ජන බලවේගය වටා ඒකරාශී වී නැතැයි සමගි ජන බලවේගයේ කුරුණෑගල දිස්ත්‍රික් පාර්ලිමේන්තු මන්ත්‍රී නලින් බණ්ඩාර මහතා පැවසීය.
ඉදිරියේදී මහනුවරදී පැවැත්වීමට නියමිත සමගි කාන්තා සම්මේලනය පිළිබඳ නාවලපිටිය ආසනයේ කාන්තාවන් දැනුවත් කිරීම සඳහා පැවැති රැස්වීමකින් අනතුරුව මාධ්‍යයට අදහස් පළ කරමින් ඊයේ (17) ඒ මහතා මේ බව කීවේය. ජාතික ජන බලවේගය වටා රටේ බහුතර ජනතාවක් ඉන්නවා කියලා සමාජ මාධ්‍ය ඔස්සේ ප්‍රචාරය කරනවා. නමුත් පෙන්වන තරම් ජනතාවක් ඒ වටා නැහැ. ශ්‍රී ලංකා පොදුජන පෙරමුණෙන් ඉවත් වූ විශාල පිරිසක් මේ වන විට විකල්පයක් වශයෙන් පක්ෂ කිහිපයක් අතරේ බෙදී ගොස් ඉන්නවා. එසේ බෙදී ගිය පිරිසක් ජාතික ජන බලවේගයට එක් වී සිටිනවා. මේ වන විට සමාජ මාධ්‍යයේ පමණක් අනුර කුමාර ජනාධිපති වෙලා ඉන්නවා. රටේ බහුතර ජනතාව මේ වන විට සමගි ජන බලවේගය සමඟ එකතු වි සිටිනවා. ඉදිරියේදී පැවැත්වෙන ඕනෑම මැතිවරණයකදී සමගි ජන බලවේගය ඉන් ජයග්‍රහණය කරනවා යැයි ද කීවේය.
