– සැකකරුවන්ගේ අාරක්ෂාව ප්‍රමාණවත්
– මරණ තර්ජන සම්බන්ධයෙන් වාර්තාවක් ගොනු කරන්න
– පුවත්පත් බලන්න දෙන්න
– සති අන්තයේ අතුරුපසක් දෙන්න
මහේස්ත්‍රාත් නියෝග කරයි
මත්කුඩු ජාවාරම් සිදු කිරීම සම්බන්ධයෙන් අත්අඩංගුවට ගෙන රැඳවුම් නියෝග මත අපරාධ පරීක්ෂණ දෙපාර්තමේන්තුව භාරයේ රඳවා සිටින පාතාලයේ ප්‍රබලයන් දෙදෙනෙකු වන සෙල්ලප්පෙරුමගේ සළිඳු ගුණරත්න නොහොත් කුඩු සළිඳු සහ වික්‍රමරත්න කසුන් චින්තක නොහොත් හරක් කටා යන අය ජනවාරි මස 03දා මරාදමන බවට පොලිස් විශේෂ කාර්ය බළකායේ සැරයන්වරයකු සිදු කළ බව කියන තර්ජනය සම්බන්ධයෙන් වාර්තාවක් ගොනු කරන ලෙස පොලිස් විශේෂ කාර්ය බළකායේ අණදෙන නිලධාරියාට කොටුව මහේස්ත්‍රාත් තිළිණ ගමගේ මහතා පෙරේදා (17) නියෝග කළේය.
එම තර්ජනය කළ බව කියන දිනට අදාළ සීසීටීවී දර්ශන එමෙන්ම පෙර දින සිදු කළ නියෝග ප්‍රකාරව අධිකරණයට ඉදිරිපත් කරන ලෙස මහේස්ත්‍රාත්වරයා අපරාධ පරීක්ෂණ දෙපාර්තමේන්තුව නියෝග කළේය.
මහේස්ත්‍රාත්වරයා මෙම නියෝගය සිදු කළේ සැකකරුවන් නිරීක්ෂණය කිරීමට ඊයේ පස්වරුවේ අපරාධ පරීක්ෂණ දෙපාර්තමේන්තුවට ගිය අවස්ථාවේදීය.
එමෙන්ම සැකකරුවන් දෙදෙනාගේ ඉල්ලීම පරිදි නිවසින් ගෙනෙන හෝ අපරාධ පරීක්ෂණ දෙපාර්තමේන්තුවේ පුස්තකාලයේ ඇති සති අන්ත පුවත්පත් සැකකරුවන්ට කියවීමට දෙන ලෙස අපරාධ පරීක්ෂණ දෙපාර්තමේන්තුවේ ස්ථානාධිපතිවරයාට නියෝග කළේය.
එමෙන්ම සෑම සති අන්තයකම සෙනසුරාදා දිනවල නිවසින් ගෙනෙන ආහාර ලබාදීමේදී අතුරුපසක් ලබාදීමට ද මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කළේය.
සැකකරුවන්ට ප්‍රමාණවත් ආරක්ෂාවක් ඇති බව නිරීක්ෂණය කරමින් සටහන් යෙදූ මහේස්ත්‍රාත්වරයා, එහි රඳවා සිටින ටී. අමිල ප්‍රනාන්දු සහ ඉන්දික දයාෂාන් වික්‍රමසිංහ යන දෙදෙනා ද නිරීක්ෂණය කළ අතර, ඔවුන්ට ඉල්ලීම් කිසිවක් තිබේ දැයි විමසා සිටි අතර, ඔවුන් ඉල්ලීම් කිසිවක් නැති බව දන්වා ඇත.
පස්වරු 3.05ට එහි ගිය මහේස්ත්‍රාත්වරයා ඔවුන් දෙදෙනා ඇතුළු එහි රඳවා සිටින සැකකරුවන් සිව්දෙනෙකු මිනිත්තු 45ක් පමණ කාලයක් නිරීක්ෂණය කර අවශ්‍ය නියෝග නිකුත් කර ඉන් පිටව ගියේය.
විදේශගතව සිටිමින් මෙරට පාතාල කල්ලි සාමාජිකයන් මෙහෙයවීම හා මනුෂ්‍ය ඝාතන, මත්ද්‍රව්‍ය ජාවාරම් හා සංවිධානාත්මක අපරාධ ක්‍රියාවන් සිදු කරමින් ජාතික ආරක්ෂාවට මෙන්ම මහජන සාමයට අවහිර වන ලෙස කටයුතු කිරීම සම්බන්ධයෙන් සැකකරුවන් අත්අඩංගුවට ගෙන රැඳවුම් භාරයේ තබා තිබේ.
