ජනාධිපති රනිල් වික්‍රමසිංහ මහතාගේ විනිවිදභාවයකින් යුතු ආර්ථිකය හැසිරවීම සහ එහි ප්‍රගතිය විදෙස් නායකයන්ගේ මෙන්ම ජාත්‍යන්තර මූල්‍ය අරමුදලේ ප්‍රශංසාවට ලක්ව ඇති බවත්, ආසියාවේ මෙන්ම ලෝකයම පිළිගත් නායකයකු බවට ජනාධිපතිවරයා පත්ව ඇති බවත් එක්සත් ජාතික පක්ෂයේ කෘත්‍යාධිකාරී මණ්ඩල සභික, කොළඹ දිස්ත්‍රික් කළමනාකරු ලසන්ත ගුණවර්ධන මහතා පැවැසීය.
ඒ මහතා මේ බව පැවැසුවේ සිරිකොත පක්ෂ මූලස්ථානයේදී පෙරේදා (17) පැවති මාධ්‍ය හමුවේදී අදහස් දක්වමිනි.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“ජාත්‍යන්තර මූල්‍ය අරමුදලේ නියෝජිතයන් සම්බන්ධ වු සමාලෝචනයේදී ආණ්ඩුව විනිවිදභාවයකින් යුතුව ආර්ථිකය හැසිරවීමත්, පාලනය කිරීමත් ඔවුන්ගේ ප්‍රශංසාවට ලක් වුණා. මේ අත්කරගෙන තිබෙන ආර්ථික ප්‍රගතිය ගැන ඔවුන් ඉතාම සතුටට පත්වන බව කියා සිටියා. විශේෂයෙන්ම මේ ආර්ථික ප්‍රගතියත් එක්ක ජාත්‍යන්තර ණයකරුවන් සහ පෞද්ගලික ණයකරුවන් සතුටට පත්වන නිසා ඔවුන් එක්ක ඇති බැඳීම වර්ධනය කර ගත හැකි බවත් සඳහන් කර සිටියා. විශේෂයෙන්ම මූල්‍ය විනය සහ ප්‍රතිපත්තිවල තිබෙන හොඳකම සහ ආදායම් මාර්ග ඉහළ යෑමත්, ආර්ථික පීඩනය ජනතාවට ලිහිල් වීමත් නිසා නත්තල් සහ අලුත් අවුරුදු සමයේ ඔවුන් නිදහසේ ගත කරන ආකාරයක් නිරීක්ෂණය වුණා. එය ඉතා හොඳ ප්‍රගතියක්.
මේ අත්කරගත් ප්‍රගතිය පිළිබඳව ජපන් විදේශ ඇමැතිවරයාගේ සංචාරයේදී රටක් විදිහට සතුටු වෙන බව ද ජනාධිපතිවරයා සමඟ ප්‍රකාශ කළා. ජපානයේ ව්‍යාපෘති මෙහි නැවත ආරම්භ කිරීමටත් එකඟතාවකට එළඹ තිබෙනවා. ජපානය අපට දුන් ණය බින්දුවයි දශම එකක වගේ ඉතාම අඩු පොලියකට දෙන නිසා ඔවුන්ගෙන් ණය ගැනීම සහ ව්‍යාපෘති ක්‍රියාත්මක කිරීම වැදගත්. ණය ප්‍රතිසංස්කරණයේ තිබෙන විනිවිදභාවය පිළිබඳවත් ජපන් විදේශ ඇමැතිවරයා ජනාධිපතිවරයාට ප්‍රශංසාව පුද කර තිබෙනවා. තොරතුරු තාක්ෂණය සහ සමුද්‍රීය කටයුතු පිළිබඳව ඔවුන් අපට සහාය දක්වන බවත් ප්‍රකාශ කළා.
ස්විට්සර්ලන්තයේදී ජනාධිපතිවරයා එහි ව්‍යාපාරික ප්‍රජාව ද මුණගැහෙනවා. ඔවුන් එහිදී විශේෂ ඇගැයීමක් ජනාධිපතිවරයාට සිදු කළා. මේ අත්කරගෙන තිබෙන ආර්ථික ප්‍රගතිය සහ ව්‍යාපාර වර්ධනය කෙරෙහි ශ්‍රී ලංකාව දක්වන උනන්දුව ගැන එහිදී ප්‍රශංසා කළා.
2017දී ස්විට්සර්ලන්තයේ පැවති මේ ආර්ථික සමුළුවට ජනාධිපතිවරයා එවකට අග්‍රාමාත්‍යවරයා ලෙස ආරාධනා ලබමින් සහභාගි වුණා. පසුව ශ්‍රී ලංකාවේ කිසිදු රාජ්‍ය නායකයකුට එවැනි ආරාධනාවක් ජාත්‍යන්තර ආර්ථික සමුළුවකින් ලැබී නෑ. දැන් නැවත ජනාධිපතිවරයාට එවැනි සමුළුවලට නිතර ආරාධනා ලැබෙනවා. “
