වැස්ස, නියඟය, එළවළු මිල ඉහළ පහළ යෑම පමණක් නොව කෘෂිකර්ම ප්‍රශ්න පත්‍රය කලින් පිටවීම පිළිබඳවත් කෘෂිකර්ම ඇමැතිවරයාට බැණීමට ඇතැම් අය පුරුදුවී ඇතැයි කෘෂිකර්ම හා වැවිලි කර්මාන්ත ඇමැති මහින්ද අමරවීර මහතා පවසයි.
ඇමැතිවරයා මේ බව පැවසුවේ පෙරේදා (17) කොළඹ වරායේ ජාත්‍යන්තර බහාලුම් පර්යන්තයේදී ඩ්‍රෝන යානා භාරදීමේ උත්සවයේදීය.
එහිදී වැඩිදුරටත් අදහස් දැක්වූ ඇමැතිවරයා මෙලෙස ද කීවේය.
“එළවළු මිල ඉහළ යෑම පිළිබඳව ආණ්ඩුවට ඇමැතිවරයාට හෝ විවිධ පුද්ගලයන්ට බැණවදිමින් නොසිට තමන්ට අවශ්‍ය එළවළු හැකි ආකාරයට තම ගෙවත්තේ වගා කරගැනීම සිදු කළ හැකියි. මේ සඳහා ජනතාව උනන්දු වන්නේ නම් එළවළු මිල ඉහළ යෑමේ ගැටලුවට යම් සහනයක් ලැබෙනවා. ඉදිරියේදීත් මේ වැනි ගැටලු ඇති නොවීමට ගෙවතු වගා වැඩපිළිවෙළක් ක්‍රියාත්මක කරන්න මම කෘෂිකර්ම දෙපාර්තමේන්තුව සහ ගොවිජන සේවා දෙපාර්තමේන්තුවට උපදෙස් දුන්නා. ඒ සඳහා අවශ්‍ය මූල්‍ය ප්‍රතිපාදන වෙන්කර දෙනවා. ඉදිරි සති කිහිපයේදී එය සිදු වෙනවා. නමුත් එතෙක් බලා නොසිට තමන්ට කෑමට ගත හැකි කුමන එළවළු වර්ගයක් හෝ වගා කරගැනීමට ජනතාවට හැකියාව තිබෙනවා.
කාටවත් බැණ බැණ හිටියා කියලා මේ ප්‍රශ්නය විසඳෙන්නේ නෑ. හැමදෙනාම එකමුතුව තමන්ගේ ගෙවත්තේ තිබෙන සුළු ඉඩ ප්‍රමාණයක හෝ එළවළු වර්ග කිහිපයක් මල් පෝච්චියක හෝ සිටුවන්නට පුළුවන්.
පසුගිය මාස 04ක පමණ කාලයක් එක දිගටම වැස්ස පැවැතුණා. අධික වර්ෂාව මෙන්ම පැවති ගංවතුර තත්ත්වය නිසා බොහෝ ප්‍රදේශවල එළවළු වගාවන් විනාශ වුණා. ඇතැම් ප්‍රදේශවල බීජ දෙතුන් වතාවක් දැම්මත් වැස්ස නිසා ඒවා විනාශ වුණා. මේ තත්ත්වය මත එළවළු මිළ ඉහළ යෑම පුදුමයක් නොවේ. වාණිජ වශයෙන් එළවළු වගා කළ ගොවීන්ට මේ නිසා තම අස්වැන්න අහිමි වුණා. මේ තත්ත්වය මත අද වන විට එළවළු මිල ඉහළ යෑම වළක්වන්න අසීරුයි.”
