ජාත්‍යන්තර සාධාරණ වෙළෙඳාම ඉදිරියට ගෙන යෑම සහ ජාත්‍යන්තර සහයෝගීතාව වර්ධනය කිරීම සඳහා වූ වැදගත් පියවරක් ලෙස ශ්‍රී ලංකාව ජාත්‍යන්තර සාධාරණ වෙළෙඳ ජාලයන් සමඟ සහයෝගීතා රාමුවට (Framework of Cooperation– FOC) නිල වශයෙන් අත්සන් කර තිබේ.
කොළඹ, රමාඩා හෝටලයේ පැවති උත්සවයකදී මේ සඳහා අත්සන් කර තිබෙන අතර, ශ්‍රී ලංකා අපනයන සංවර්ධන මණ්ඩලයේ සභාපති සහ ප්රධාන විධායක නිලධාරි ආචාර්ය කිංස්ලි බර්නාඩ්, සාධාරණ වෙළෙඳාම පිළිබඳ ශ්‍රී ලංකාවේ ආසියා සහ පැසිෆික් නිෂ්පාදකයන්ගේ ජාලයේ සභාපති ආර්. ඥානසේකරන් සහ WFTO ශ්‍රී ලංකා සභාපති ටී. ප්‍රනාන්දු මහත්වරුන් මේ සහයෝගීතා රාමුවට අත්සන් කර ඇත. එහිදී ප්රධාන සාධාරණ වෙළෙඳ සංවිධාන සහ සහායක ආයතනවල නියෝජිතයන් සහභාගි වී තිබේ.
ශ්‍රී ලංකාවේ සාධාරණ වෙළෙඳ ජාල සහ අදාළ ආයතන අතර සබඳතා ශක්තිමත් කිරීම සහ වැඩිදියුණු කිරීම සහයෝගීතා රාමුවෙහි මූලික අරමුණ වන අතර, එය ශ්‍රී ලංකාවෙන් ගෝලීය වෙළෙඳපොළට සාධාරණ වෙළෙඳ භාණ්ඩවල සංවර්ධනය, විවිධාංගීකරණය සහ පුළුල් වෙළෙඳපොළ ප්‍රවේශය ප්‍රවර්ධනය කිරීම අරමුණු කරයි. නුදුරු අනාගතයේදී සහාය දක්වන ආයතන සමඟ සහයෝගීව පුළුල් ක්‍රියාකාරී සැලසුම් බවට තවදුරටත් සංවර්ධනය කෙරෙන බහුවිධ අරමුණු සහ අදාළ ක්‍රියාකාරකම් සහයෝගීතා රාමුවේ දක්වා ඇත.
