IMF ජ්‍යෙෂ්ඨ දූත මණ්ඩල ප්‍රධානී පීටර් ඇතුළු පිරිස පැවසූ බව වැඩ බලන මුදල් ඇමැති ශෙහාන් කියයි
කුමන පාර්ශ්වයක් බලයට පැමිණිය ද ජාත්‍යන්තර අරමුදලේ මඟ පෙන්වීම යටතේ ශ්‍රී ලංකාව ක්‍රියාත්මක කරන ප්‍රතිසංස්කරණ රටේ ආර්ථික අභිවෘද්ධියට අවශ්‍ය බවත් ඒ සම්බන්ධයෙන් පක්ෂ විපක්ෂ සියලු පාර්ශ්ව වෙත දන්වා සිටින බවත් මෙරට සංචාරයක නිරත ජාත්‍යන්තර මූල්‍ය අරමුදලේ ජ්‍යෙෂ්ඨ දූත මණ්ඩල ප්‍රධානී පීටර් බෲවර් සහ කණ්ඩායම සඳහන් කළ බව වැඩ බලන මුදල් ඇමැති ශෙහාන් සේමසිංහ මහතා පැවසීය.
ආර්ථික අර්බුදයෙන් මිදීමට සිය මඟපෙන්වීම යටතේ ශ්‍රී ලංකාව ක්‍රියාත්මක කරමින් සිටින ප්‍රතිසංස්කරණවල ප්‍රගතිය පිළිබඳව සතුටට පත්වන බවත්, ඒවා නොවෙනස්ව ක්‍රියාත්මක කිරීමේ අවශ්‍යතාව ජාත්‍යන්තර මූල්‍ය අරමුදලේ නියෝජිතයන් අවධාරණය කළ බවත් ඇමැතිවරයා සඳහන් කළේය. එහි දී අදාළ ප්‍රතිසංස්කරණ සහ ඒවායේ කාලරාමු පිළිබඳ වැඩිදුරටත් සාකච්ඡා කළ බවත් කීය. මෙරට සංචාරයක නිරත ජාත්‍යන්තර මූල්‍ය අරමුදලේ ජ්‍යෙෂ්ඨ දූත මණ්ඩල ප්‍රධානී පීටර් බෲවර් සහ කණ්ඩායම සමඟ IMF වැඩසටහන පිළිබඳ ඇමැති ශෙහාන් සේමසිංහ මහතාගේ ප්‍රධානත්වයෙන් ජනාධිපති ලේකම් කාර්යාලයේ පැවැති සමාලෝචන රැස්වීමේ දී මේ අදහස් පළ විය.
එහි දී දූත පිරිස සිය උතුරු සහ නැඟෙනහිර සංචාරය පිළිබඳව ද අදහස් පළ කළ අතර ඔවුන්ද මේ ක්‍රියාවලියේ කොටස්කරුවන් බවට පත් කර ගැනීමේ අවශ්‍යතාව අවධාරණය කළ බව ඇමැතිවරයා වැඩිදුරටත් සඳහන් කළේය.
