ඉන්දුනීසියාවේ බාලි දූපතේ නිවාඩුව ගත කරමින් සිටියදී සිය මව ඝාතනය කිරීමට සහාය දුන් බවට චෝදනා එල්ල වු අමෙරිකානු ජාතික කාන්තාවකට එරට අධිකරණයකින් වසර 26ක සිර දඬුවම් නියම කර ඇතැයි වාර්තා වේ. 26 හැවිරිදි හීදර් මැක් නමැති මේ කාන්තාව 2014 වසරේදී සිය මව ඝාතනය කිරිමට එවකට ඇගේ පෙම්වතා වූ ටොමි ෂීෆර්ට සහාය දුන් බවට චෝදනා එල්ල වී තිබිණි.
සිය මව සතුව තිබූ ඩොලර් මිලියන 1.5ක වත්කම් හිමි කර ගැනීමේ අරමුණින් එම ඝාතනය සිදු කර ඇති අතර, ඇයට එරෙහිව අමෙරිකාවේදී නඩු ගොනු කර ඇත්තේ ඉන්දුනීසියාවේදී අත්අඩංගුවට පත්ව වසර 6ක සිර දඬුවම් විඳ යළි අමෙරිකාව බලා පැමිණිමෙන් පසුවය.
මව ඝාතනය කිරීමෙන් පසු ඇගේ සිරුර කැබලි කර ගමන් මල්ලක අසුරා කුලී රථයක අතහැර දමා ගොස් තිබූ අතර, පසුව කුලී රථයේ රියැදුරා පොලිසියට පැමිණිලි කිරීමෙන් පසු බාලි දූපතේම වෙනත් හෝටලයක ලැගුම් ගෙන සිටි හීදර් සහ ඇගේ පෙම්වතා ඉන්දුනීසියානු පොලිසිය විසින් අත්අඩංගුවට ගනු ලැබිය. හීදර් මැක්ට ඉන්දුනීසියාවේ අධීකරණයෙන් වසර 10ක සිර දඬුවම් නියම වූවද, පසුව වසර 6කට පසු ඇය නිදහස ලැබුවාය.
