Home » පොලිසිය කුසලාන වටයට ඉව අල්ලයි

පොලිසිය කුසලාන වටයට ඉව අල්ලයි

by mahesh
January 12, 2024 1:00 am 0 comment

ෆවුස් මොහොමඩ්

අන්තර් සමාජ පළමු පෙළ ලීග් රග්බි තරගාවලියේ කුසලාන වටයට සුදුසුකම් ලබන සිව්වැනි කණ්ඩායම බවට පත්වීමේ අරමුණින් පොලිස් ක්‍රීඩා සමාජය මේ සති අන්තයේදී සී.එච්. ඇන්ඩ් එෆ්.සී. ක්‍රීඩා සමාජය සමඟ තරග බිමට එක් වෙයි.

මේ වන විට අවසන් වී ඇති තරග 5කින් 2ක් ජයගත් පොලිසිය ප්‍රසාද ලකුණු සටහනේ පස්වැනි තැන පසුවන අතර, සී.එච්. පිල තරග 3ක් ජයගෙන සිව්වැනි තැන රැඳී සිටී. කෙසේ වෙතත් දෙපිල අතර ප්‍රසාද ලකුණු 6ක පරතරයක් ඇති බැවින් අනිද්දා (14) කොළඹ තුරඟ තරග පිටියේ පැවැත්වෙන මේ තරගය වැඩි ලකුණු පරතරයකින් ජය ගැනීම පොලිස් පිලේ අරමුණ වී තිබේ. මේ තරගයෙන් පසු පොලිසියට ඉතිරිව ඇත්තේ ලබන සතියේ ගුවන් හමුදා පිල සමඟ පැවැත්වෙන තරගය වන අතර, මෙතෙක් එක් ජයග්‍රහණයක් ලබා සිටින ගුවන් හමුදා පිල පසුවන්නේ ප්‍රසාද ලකුණු සටහනේ 7 වැනි තැනය.

එසේ වුවද සිය ස්ථානය තවදුරටත් තහවුරු කරගැනීමේ අපේක්ෂාවෙන් පසුවන සී.එච්. පිල වෙතින් පොලිසියට දැඩි අභියෝගයක් එල්ල වනු ඇත. අවසන් සතියේදී යුද හමුදා පිල සමඟ තරග වැදීමට නියමිත අතර, එම තරගය දෙපිලටම විවෘත තරගයක් බවට ද පත්වනු ඇත්තේ යුද හමුදා පිලත් කුසලාන වටයේ බලාපොරොත්තු තවදුරටත් රඳවාගෙන සිටින බැවිනි.මේ වන විට ප්‍රසාද ලකුණු 8ක් ලබා 6 වැනි තැන සිටින යුද හමුදා පිල අද (12) පස්වරුවේ ගුවන් හමුදා පිල සමඟ රත්මලානේදී තරග වදී.

අපරාජිත මහනුවර පිල සහ නාවික හමුදා පිල අතර තරගය හෙට (13) වැලිසර දී පැවැත්වෙන අතර, සී.ආර්. සහ හැව්ලොක්ස් පිල අතර තරගය එදිනම සී.ආර්. පිටියේදී පැවැත්වීමට නියමිතය.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT