කෑගල්ල, කුරුණෑගල සහ මහනුවර යන දිස්ත්‍රික්කවල පදිංචිව සිටින ජනයාගේ සුභ සිද්ධිය වෙනුවෙන් රුපියල් මිලියන 176ක් වියදමින් සිව් මහල් අක්ෂි රෝහලක් රඹුක්කන ඉදිකර ඉකුත්දා (09) සෞඛ්‍ය අමාත්‍ය රමේෂ් පතිරණ මහතාගේ සුරතින් විවෘත කෙරිණ.
කෑගල්ල දිස්ත්‍රික්කයේ අක්ෂි රෝගීන් කලක සිට රත්නපුර, සීදුව, රාගම වැනි රෝහල්වලට ප්‍රතිකාර ලබා ගැනීමට යාමට සිදුව පැවති අතර ඒ පිළිබඳ අවධානය යොමු කළ සෞඛ්‍ය බලධාරීන් කෑගල්ල දිස්ත්‍රික්කයට අක්ෂි රෝහලක අවශ්‍යතාවය හඳුනා ගෙන තිබුණි. පසුව රජයේ අවධානය යොමු කර අක්ෂි රෝහලක් කෑගල්ල දිස්ත්‍රික්කයේ ඉදි කිරීමට සුදුසු ස්ථානය ලෙස රඹුක්කන නගරය තෝරා ගෙන තිබුණි. රඹුක්කන නගරය තෝරා ගැනීමට ප්‍රධාන හේතුව වී ඇත්තේ රඹුක්කන නගරය ආසන්නව පිහිටා ඇති කුරුණෑගල හා මහනුවර දිස්ත්‍රික්කවල පදිංචිව සිටින ජනයාට ද එමඟින් ප්‍රතිකාර ලබා ගැනීමට ඇති හැකියාව හේතුවෙන්ය.
වර්තමානයේ වසරකට කෑගල්ල දිස්ත්‍රික්කයේ අක්ෂි රෝගීන් 5000ට වැඩි පිරිසක් දිවයිනේ සෙසු ප්‍රදේශවල පිහිටි අක්ෂි රෝහල් කරා ඇදී යාමට සිදුව තිබුණි.
වර්තමාන ජනාධිපති රනිල් වික්‍රමසිංහ මහතාගේ පාලන සමයේ “නීරෝගිමත් ජනතාවක්” බිහි කිරීමේ අරමුණින් සබරගමුව පළාත් සභා අරමුදල් හා සෞඛ්‍ය පද්ධති වැඩි දියුණු කිරීමේ ව්‍යාපෘතිය යටතේ ලෝක බැංකු ප්‍රතිපාදන යටතේ රුපියල් මිලියන 176.5ක් වැය කර රඹුක්කන ප්‍රාදේශීය රෝහලට අනුබද්ධ සිව් මහල් අක්ෂි රෝහලක් ඉදි කෙරිණ.
ඉදි කරන ලද නව සිව් මහල් අක්ෂි රෝහල කෑගල්ල දිස්ත්‍රික් පාර්ලිමේන්තු මන්ත්‍රී තාක්ෂණ රාජ්‍ය අමාත්‍ය කනක හේරත්, උතුරු මැද ආණ්ඩුකාරවර මහීපාල හේරත් මහත්වරුන්ගේ ආරාධනයෙන් සබරගමුව ආණ්ඩුකාරවර කෑගල්ල දිස්ත්‍රික් සම්බන්ධීකරණ කමිටුවේ සම සභාපති අධිනීතිඥ නවින් දිසානායක, වර්තමාන සෞඛ්‍ය අමාත්‍ය රමේෂ් පතිරණ මහතාගේ මූලිකත්වයෙන් නව සිව් මහල් අක්ෂි රෝහලේ සමරු ඵලකය නිරාවරණය කෙරිණ. පසුව සෞඛ්‍ය අමාත්‍ය රමේෂ් පතිරණ, සබරගමුව ආණ්ඩුකාරවර අධිනීතිඥ නවින් දිසානායක, රාජ්‍ය අමාත්‍ය කනක හේරත්, කෑගල්ල දිස්ත්‍රික් සම්බන්ධිකරණ කමිටුවේ සභාපති රාජීකා වික්‍රමසිංහ මහත්ම මහත්මීන්ගේ සුරතින් සිව් මහල් ගොඩනැඟිල්ලේ පිත්ත පටිය කපා ගොඩනැඟිල්ල විවෘත කෙරිණ.
එම අවස්ථාවට කෑගල්ල දිස්ත්‍රික් පාර්ලිමේන්තු මන්ත්‍රී කෑගල්ල දිස්ත්‍රික් සම්බන්ධීකරණ කමිටුවේ සභාපති රාජීකා වික්‍රමසිංහ, හිටපු අමාත්‍යවරයකු වන ඒ. ඩී. චම්පිකා ප්‍රේමදාස, ගලිගමුව ප්‍රාදේශීය සභාවේ හිටපු සභාපති සමන් ජයසිංහ, සබරගමුව පළාත් ලේකම් මහින්ද එස්. වීරසූරිය, කෑගල්ල දිස්ත්‍රික් ලේකම් රන්ජන ජයසිංහ, කෑගල්ල දිස්ත්‍රික් සෞඛ්‍ය සේවා අධ්‍යක්ෂ විශේෂඥ වෛද්‍ය කුමාර් වික්‍රමසිංහ යන මහත්ම මහත්මීන් එක්ව සිටියහ.
