Home » මත්තෙගොඩ කැළි කසළ අතගාන දෑත් 8කට හරසර ප්‍රණාම

මත්තෙගොඩ කැළි කසළ අතගාන දෑත් 8කට හරසර ප්‍රණාම

by mahesh
January 12, 2024 1:00 am 0 comment

කොට්ටාව - ප්‍රදීප් කුමාර

වසර පහළොවක් පුරා මත්තේගොඩ නිවාස සංකීර්ණය ඇතුළු අවට ප්‍රදේශවල කසළ බැහැර කිරීම සඳහා පැමිණෙන හෝමාගම ප්‍රාදේශීය සභාවේ සෞඛ්‍ය කම්කරුවන් අටදෙනකු අගයා Òකෘතවේදී හරසර 2023Ó තිළිණ හා වියළි ආහාර පාර්සල් බෙදා දීමේ ආදර්ශවත් වැඩසටහනක් බස්නාහිර පළාතේ උඩුගහපත්තුව සල්පිටි කෝරළේ ප්‍රධාන සංඝනායක ශාස්ත්‍රවේදී පන්ගම්විලයායේ සෝරත නාහිමියන්ගේ ප්‍රධානත්වයෙන් මත්තේගොඩ ශ්‍රී පියරතනාරාම විහාරස්ථානයේදී ඉකුත්දා පැවැත්වුණි.

මෙම සද්කාර්ය මත්තේගොඩ පොලිස් වසමේ 587/A හා 587/B ග්‍රාමසේවා වසම් දෙකෙහි ප්‍රජා පොලිස් කමිටු නිලධාරීහු සංවිධානය කර තිබුණි. එහිදී සෞඛ්‍ය කම්කරුවන් සිදුකරන සමාජ මෙහෙවර අගය කරමින් ගල්කිස්ස කොට්ඨාස අංක 4 සහකාර පොලිස් අධිකාරී දර්ශන කුරුකුලසූරිය මහතා ඇගයුම් දේශනයක් පැවැත්වීය.

අනතුරුව මූලාසනයේ වැඩ සිටි පූජ්‍ය පන්ගම්විලයායේ සෝරත නාහිමියන් ඇතුළු ආරාධිතයින් අතින් පී. ඒ. විජිත කුමාර, කේ. ආර්. ආර්. දේශප්‍රිය, පී. ඊ. රනිල් දර්ශන, ඇම්. ඒ. සජිත් පෙරේරා, පී. ආර්. ඉමේෂ් රවිෂාන්, පී. අයි. ඇම්. පෙරේරා, ජයන්ත පෙරේරා සහ ආර් .ඒ. ප්‍රේමසිරි යන සෞඛ්‍ය කම්කරුවන් වෙත මත්තේගොඩ ප්‍රජා පොලිස් කමිටුව මඟින් පිදෙන කෘතවේදී හරසර 2023 තිළිණ හා වියළි ආහාර පාර්සල් බෙදා දීම සිදු කෙරිණි.

ඊට අමතරව මත්තේගොඩ මධ්‍යම 587/A ප්‍රජා පොලිස් කමිටුවේ වසර පහකට වඩා සේවයේ නිරත හිටපු සභාපතිනී පී. ආර්. කේ. ඇඹුල්දෙණිය මහත්මියගේ හා සම ලේකම් පී. ආර්. කේ. නිලූකා ජීවන්ති යන අයගේ සේවය අගයා මත්තේගොඩ පොලිස් ස්ථානය මගින් Òකෘතවේදී හරසර 2023Ó තිළිණ ලබා දෙන ලදී.

මත්තේගොඩ පොලිසියේ ස්ථානාධිපති පොලිස් පරීක්ෂක ඉන්දික කුමාර මහතාගේ උපදෙස් මත ප්‍රජා පොලිස් ඒකකයේ ස්ථානාධිපති පොලිස් සැරයන් (17429) ප්‍රසාද් ගුණරත්න මහතාගේ මෙහෙයවීමෙන් ප්‍රජා පොලිස් කමිටුව මෙම වැඩසටහන සංවිධානය කර තිබුණි.

මෙම අවස්ථාවට මත්තේගොඩ ශ්‍රී පියරතනාරාමාධිපති උඩුගහපත්තුව සල්පිටි කෝරළේ ප්‍රධාන සංඝනායක රත්මලාන පරම ධම්මචේතිය පිරිවෙනේ විශ්‍රාමික නියෝජ්‍ය පරිවේණාධිපති ශාස්ත්‍රවේදී පන්ගම්විලයායේ සෝරත නා හිමි, ගල්කිස්ස කොට්ඨාස අංක 4 සහකාර පොලිස් අධිකාරී දර්ශන කුරුකුලසූරිය, මත්තේගොඩ පොලිසියේ ස්ථානාධිපති පොලිස් පරීක්ෂක ඉන්දික කුමාර, රථවාහන අංශයේ ස්ථානාධිපති පොලිස් පරීක්ෂක ගමගේ, ප්‍රජා පොලිස් ඒකකයේ ස්ථානාධිපති පොලිස් සැරයන් ප්‍රසාද් ගුණරත්න, මත්තේගොඩ නැඟෙනහිර ග්‍රාම නිලධාරී අනුරාධ හේරත්, හෝමාගම ප්‍රාදේශීය සභාවේ සෞඛ්‍ය පරිපාලක කුෂාන් ඉන්දික, නුවන් දර්ශන ඇතුළු ප්‍රජා පොලිස් කමිටු සාමාජිකයින් පිරිසක් සහභාගී වී සිටියහ.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT