නෙළුම් පොකුණ රඟහලින් රුපියල් ලක්ෂ හතරකට ආසන්න වටිනා මෝටරයක් ඇතුළු දේපළ රැසක් සොරාගත් යුද හමුදා සෙබළකු අත්අඩංගුවට ගත් බව කුරුඳුවත්ත පොලිසිය සඳහන් කරයි.
සැකකරු සොරාගත් භාණ්ඩ අතර ත්‍රී පේස් මෝටරයක් , යකඩ කපන කියතක්, බෝල්ට් නට් උරයක් හා තවත් දේපළ රැසක් වන බව පොලිසිය සඳහන් කරයි.
නෙළුම් පොකුණ රඟහලට යාබදව තිබෙන කෞතුකාගාර පරිශ්‍රය වෙත තාප්පයෙන් පැන රාත්‍රී කාලයේදී අනවසරයෙන් ඇතුළු වී තිබූ සැකකරු කෞතුකාගාර ආරක්ෂක නිලධාරීන් විසින් අල්ලාගෙන කුරුඳුවත්ත පොලිසියේ රාත්‍රී ජංගම සංචාරය වෙත භාරදී තිබූ බව පොලිසිය සඳහන් කරයි.
අපරාධ විමර්ශන අංශයේ නිලධාරීන් විසින් සිදුකළ ප්‍රශ්න කිරීමේදී එම සැකකරු නෙළුම් පොකුණ රඟහලේ ගබඩාවේ තිබී සොරා ගත් බව කියන ත්‍රී පේස් මෝටරය ඇතුළු අනෙකුත් දේපළ රැසක් කෞතුකාගාර පරිශ්‍රයේ සඟවා තිබියදී සොයා ගැනීමට හැකිවූ බව පොලිසිය සඳහන් කරයි.
සැකකරුගෙන් වැඩිදුරටත් ප්‍රශ්න කිරීමේදී සැකකරු නෙළුම් පොකුණ රඟහලේ අලංකරණ රාජකාරී සිදු කරන හත්වන ගජබා රෙජිමේන්තුවේ බත්තරමුල්ල යුද හමුදා මූලස්ථානයට අනුයුක්තව රාජකාරි කරනු ලබන යුද හමුදා සෙබළෙක් බවට අනාවරණය වී තිබූ බව පොලිසිය සඳහන් කරයි.
අත්අඩංගුවට ගත් සැකකාර යුද හමුදා සෙබළා පිළියන්දල මිරිස්වත්ත ගැඩබුවාන පදිංචිකරුවෙකි.
සැකකරු අධිකරණය වෙත ඉදිරිපත් කිරීමට නියමිතය. කුරුඳුවත්ත පොලිසියේ ස්ථානාධිපති ප්‍රධාන පොලිස් පරීක්ෂක ආලෝක බණ්ඩාර සේනානායක මහතාගේ උපදෙස් මත පරීක්ෂණ පැවැත්වේ.
