විනාඩි නවයකදී ලක්ෂ දහතුනක් සොරාගනී

හොරණ සුපිරි වෙළෙඳසලකට ඇතුළු වූ පුද්ගලයකු විනාඩි නවයක් තුළදී රුපියල් ලක්ෂ 13කට ආසන්න මුදලක් සොරාගෙන ගොස් ඇතැයි හොරණ මූලස්ථාන පොලිසිය කියයි.

ඊයේ (11) අලුයම වෙළෙඳසල ඉදිරිපිට තිබෙන කුඩා කුටියක වීදුරුවක් හා ලෑල්ලක් කඩා වෙළෙඳසලට ඇතුළු වී තිබූ එම පුද්ගලයා වෙළෙඳසල පිටුපසට වන්නට තිබෙන කාර්යාලයේ තිබූ මුදල් මෙලෙස සොරාගෙන ගොස් ඇතැයි පොලිසිය සඳහන් කරයි.

පෙරේදා (10) දින ව්‍යාපාර කටයුතුවලින් එකතුව තිබූ ලක්ෂ 13කට ආසන්න මුදල සේප්පුවේ තැන්පත් කිරීම සඳහා එය භාරව සිටින නිලධාරියා නොමැති වීම හේතුවෙන් එම මුදල් තොගය ඉටි බෑගයක දමා මේසය යට තැබීමෙන් අනතුරුව එය පිටතට නොපෙනීම සඳහා ලාච්චුවකින් වසා දමා තිබියදී මෙම සොරකම සිදුකර ඇති බව පොලිසිය කියයි.

සොරකම සඳහා පැමිණි පුද්ගලයා වෙළෙඳසල ඉදිරිපිට දකුණු පසට වන්නට තිබෙන වීදුරු කුටියේ තාප්පය දෙසට වන්නට තිබෙන වීදුරුවක් කඩා ඊට ආවරණය කර තිබෙන හාඩ්බෝඩ් එකද කඩා වෙළෙඳසලට ඇතුළු වී තිබෙන බවට පොලිසිය සිදු කළ මූලික විමර්ශනවලදී අනාවරණය වී ඇත.

එයින් අනතුරුව සැකකරු වෙළඳසල තුළ තිබෙන සියලුම විදුලි පහන් නිවා දමමින් කාර්යාලය දෙසට පැමිණ එහි දොරද පෙර ආකාරයෙන්ම කඩා ඇතුළු වී කාර්යාලය තුළ විදුලි පහන් දල්වා විනාඩි කිහිපයක් ඒ මේ අත සක්මන් කරමින් මේස බලමින් ලාච්චුව උස්සා බලා මුදල් බෑගය රැගෙන ගොස් ඇති බව පොලිසිය කියයි.

මුදල් සොරාගැනීම සඳහා එම පුද්ගලයා වෙළෙඳසල තුළට පැමිණෙන විට එහි එලාම් නාද නොවීම දැඩි ගැටලුවක් බවත් එහි කාර්යාලය තුළටම ගොස් මේසය යට ලාච්චුවකින් වසා තිබෙන මුදල් තොගය සොරා ගැනීම සේවය කරන සේවකයෙකු හෝ සේවිකාවක ලබා දුන් ඔත්තුවක් අනුව සිදුකළ බවට බොහෝ දුරට සැක කළ හැකි යැයි පොලිසිය සඳහන් කරයි.

මුදල් සොරාගැනීම සඳහා පැමිණි පුද්ගලයා අලුයම 2.18ට පමණ වෙළෙඳසල තුළට ඇතුළු වී මුදල් සොරාගැනීමෙන් අනතුරුව විනාඩි නවයක් වැනි ඉතා කෙටි කාලයක් තුළදී (2.27) පිටවී ඇති බව සීසීටීවී දර්ශනවලින් වැඩිදුරටත් අනාවරණය වී ඇත.

පානදුර පොලිස් කොට්ඨාසයේ අපරාධ පරීක්ෂණාගාරයේ නිලධාරීන් සහ ඇඟිලි සටහන් නිලධාරීන් පැමිණ පරීක්ෂණ පැවැත්වූහ.

පානදුර කොට්ඨාස භාර ජ්‍යෙෂ්ඨ පොලිස් අධිකාරී සමන්ත වෙදගේ, සහකාර පොලිස් අධිකාරි උදය කුමාර මහත්වරුන්ගේ උපදෙස් මත මූලස්ථාන පොලිසියේ වැඩ බලන ස්ථානාධිපති ප්‍රධාන පොලිස් පරීක්ෂක කේ.එස්. දර්ශන, අපරාධ විමර්ශන අංශයේ ස්ථානාධිපති උප පොලිස් පරීක්ෂක ඩී. එල්. වී. අබේසිරි, පොලිස් සැරයන් (35477) ලලිත්, පොලිස් කොස්තාපල් වන (69128) මහත්වරුන් පරීක්ෂණ පවත්වති.