ත්‍රිකුණාමලයේ සිට සිමෙන්ති මිටි 600 ක් පටවාගත් ලොරි රථයක් වාලච්චේන හරහා, හම්බන්තොට දක්වා වාලච්චේන පූනානි ප්‍රදේශයේ ගංවතුර මැදින්,11 වෙනිදා සවස යෑමට උත්සහ කිරීමේදී එම ලොරිය පෙරළී අනතුරට ලක්ව ඇති බව වාලච්චේන පොලිසියේ සඳහන් කරයි.
ලොරිය පෙරළීමෙන් රියැදුරට සහ සහායකයාට කිසිදු අනතුරක් සිදුව නොමැති අතර සිමෙන්ති මිටි හයසියයක ප්‍රමාණයක් විනාශයට පත්ව ඇති බවද වාලච්චේන පොලිසිය සඳහන් කරයි.
වාලච්චේන පූනානි ප්‍රදේශයේ අඩි 3 ක් පමණ ජලයෙන් යටව පවතින අතර ඒ හරහා ගමන් කිරීමට උත්සාහ ගත් පිටි පටවා ගත් ලොරි රථයක්ද මාර්ගයෙන් ඉවතට පැන අනතුරට ලක්ව තිබෙන බව වාලච්චේන පොලිස් ස්ථානාධිපති ප්‍රධාන පොලිස් පරීක්ෂක ලසන්ත බණ්ඩාර මහතා අප කළ විමසීමකදී සඳහන් කළේය.
ත්‍රිකුණාමලයේ සිට වාලච්චේන හරහා පොලොන්නරුව දෙසට එම පිටි පටවා ගත් ලොරිය යෑමට උත්සාහ දරා ඇත.
මේ වන විට ලොරියෙ පිටි වෙනත් ලොරියකට මාරු කිරීමට රියැදුරු සහ සහයකින් කටයුතු කර තිබේ. පොලොන්නරුව මාදුරුඔය, කුඩාඔය, පූනානි විල්ලූව පිටාර ගැලීම හේතුවෙන් පොලොන්නරුව මඩකලපුව ප්‍රධාන මාර්ගයේ වැලිකන්ද, පූනානි අතර ස්ථාන පහකින් පමණ ජලයෙන් යටව පවතින බවද පොලිසිය සඳහන් කරයි.
