බටපොළ සැක සහිත පුද්ගලයකුගෙන් ප්‍රශ්න කිරීමේදී හොරකම් රැසක් හෙළි වේ

යුක්තිය මෙහෙයුමට සමගාමීව සැක සහිත පුද්ගලයකු බටපොළ පොලිසිය විසින් අත්අඩංගුවට ගෙන ඔහුගෙන් වැඩිදුර කරන ලද ප්‍රශ්න කිරීම්වලදී රත්ගම, අම්බලන්ගොඩ ඇල්පිටිය, බටපොල ප්‍රදේශවල නිවෙස්වලින් සොරාගන්නා ලද රූපවාහිනී ඇතුළු විදුලි උපකරණ, ගෑස් සිලින්ඩර ඇතුළු ඉපැරණි පිත්තල භාණ්ඩ රැසක් සොයා ගැනීමට හැකියාව ලැබී ඇත. මෙම සැකකරු පාළු ප්‍රදේශවල ගමන් කරමින් පදිංචිකරුවන් නොමැති නිවාස පිළිබඳ සොයා බලා නිවාසවලට ගොස් ජනේල හෝ දොරවල් කඩාගෙන ඇතුළු වී නිවාසවල තිබෙන විවිධ භාණ්ඩ සොරකම් කරන බව පොලිසිය පවසයි. මොහුගේ බිරිය ඉතාලියේ සිටින අතර ඔහු දිනපතා බස් රථවලින් ගමන් කර විවිධ ප්‍රදේශවලට ගොස් මෙම නිවාසවලින් භාණ්ඩ සොරකමේ යෙදෙන බව පොලිසිය විසින් ප්‍රශ්න කිරීමේදී අනාවරණය කරගෙන ඇත. මෙසේ සොරකම් කරන ලද භාණ්ඩ විවිධ පුද්ගලයන්ට විකුණා ඇති අතර බටපොල පොලිසිය විසින් එම භාණ්ඩ සොයාගෙන ඇත. මෙතෙක් කරන ලද ප්‍රශ්න කිරීම්වලදී ලක්ෂ විසි පහකට ආසන්න වටිනාකමින් යුත් භාණ්ඩ පොලිසිය විසින් සොයාගෙන ඇති අතර බටපොල පොලිසිය වැඩිදුර පරීක්ෂණ පවත්වයි. සැකකරු බළපිටිය මහේස්ත්‍රාත් අධිකරණය හමුවට ඉදිරිපත් කිරීමට නියමිතයි.