සොරා ගන්නා ලද යතුරුපැදියකින් පොලිස් වසම් ගණනාවකම සංචාරය කරමින් කාන්තාවන්ගේ රුපියල් ලක්ෂ ගණනක් වටිනා රන් මාල කඩා ගෙන පැන ගොස් සිටි බව කියන සැකකරුවන් දෙදෙනෙකු හඳුනා ගැනීමේ පෙරෙට්ටු කිහිපයක් සඳහා මේ මස 23 වැනිදා දක්වා රිමාන්ඩ් භාරයේ රඳවා තැබීමට අත්තනගල්ල අංක 02 මහේස්ත්‍රාත් මංජුල කරුණාරත්න මහතා පෙරේදා (10) පස්වරුවේ නියෝග කළේය.
වේයන්ගොඩ, මැද්දවත්ත ප්‍රදේශයේ පදිංචි අශෝක සුමුදු සම්පත් හෙවත් ‘ආනා’ හා උතුවන්බෝගහවත්ත ප්‍රදේශයේ පදිංචි මනෝජ් හර්ෂණ හෙවත් ‘බැකෝ’ යන දෙදෙනෙකු එසේ රිමාන්ඩ් කෙරිණි.
වේයන්ගොඩ ප්‍රදේශයේ දී පා ගමනින් ගිය කාන්තාවකගේ රන් මාලයක් යතුරුපැදියකින් පැමිණි කොල්ලකරුවන් දෙදෙනෙකු කඩා ගෙන ගිය බවට ලද පැමිණිල්ලකට අනුව වේයන්ගොඩ පොලිසිය පරීක්ෂණ පවත්වා සැකකරුවන් දෙදෙනා අත්අඩංගුවට ගෙන ප්‍රශ්න කිරීමේදී වේයන්ගොඩ හා නිට්ටඹුව ඇතුළු පොලිස් වසම් කිහිපයකදීම රන් මාල නමයක් කඩා ගෙන ගොස් උකස් කර ඇති බවට හෙළි වී ඇත.
මොවුන් දෙදෙනා රන් මාල කඩා ගෙන යාමට භාවිතා කරන ලද යතුරුපැදිය පිළිබඳව පරීක්ෂණ පැවැත්වීමේදී එය වේයන්ගොඩ නගරයේ නවතා තිබියදී සොරා ගෙන ගිය එකක් බවට හෙළි වී ඇත.
මොවුන් දෙදෙනා කඩා ගෙන ගොස් තිබූ රන් මාල නමයකින් අටක් උකස් මධ්‍යස්ථානවලට උකස් කිරීමෙන් අනතුරුව උණු කර තිබියදී පොලිසිය භාරයට ගෙන ඇති බව සැකකරුවන් දෙදෙනා ආවරණය කර අධිකරණය වෙත ඉදිරිපත් කරමින් වේයන්ගොඩ පොලිසියේ අපරාධ විමර්ශන අංශයේ ස්ථානාධිපති පොලිස් පරීක්ෂක සුනිල් ප්‍රේමරත්න මහතා පවසා සිටියේය.
එසේ කඩා ගෙන ගොස් තිබූ එක රන් මාලයක් සැකකරුවන් භාරයේ තිබී සොයා ගත් බව ද පොලිස් පරීක්ෂකවරයා පවසා සිටියේය.
මොවුන් විසින් මේ අයුරින් තවත් රන් මාල කඩා ගෙන ගොස් ඇති බවට මූලික පරීක්ෂණවල දී හෙළි වී ඇති හෙයින් ඒ පිළිබඳව වැඩිදුරටත් පරීක්ෂණ පවත්වා ගෙන යන බව ද පොලිස් පරීක්ෂකවරයා සඳහන් කළේය.
පොලිසියේ කරුණු දැක්වීම්වලින් අනතුරුව එසේ සැකකරුවන් දෙදෙනා රිමාන්ඩ් භාරයේ රඳවා තබා ගැනීමට නියෝග කළේය.
මෙම නඩුව නැවත කැඳවීම මේ මස 23 වනදාට කල් තැබිණ.
