සිවිල් ආරක්ෂක බළකායේ පොලොන්නරුව මූලස්ථාන කලාප කාර්යාලයේ නිල නිවසක දින කිහිපයක් නවාතැන් ගෙන එම බළකායට අයත් බොලෙරෝ රථයකින් පැමිණ වාලච්චේන ඕමනියාමඩු ප්‍රදේශයේ නිදන් හාරමින් සිටි පස් දෙනෙකු නිදන් හැරීමට උපයෝගි කරගත් භාණ්ඩ රැසක් සමඟ පෙරේදා (10) සවස විශේෂ කාර්ය බළකාය අත්අඩංගුවට ගෙන පොලිසියට භාර දී ඇත.
අත්අඩංගුවට ගත් සැකකරුවන් මාතර, බෝගම්පිටිය, අම්පාර, මැදිරිගිරිය සහ වැලිකන්ද අසේලපුර ප්‍රදේශයේ පදිංචි අවුරුදු 25ත්, 45ත් යන වයසේ පසු වන්නන් බව පරීක්ෂණ පවත්වන වාලච්චේන පොලිසිය සඳහන් කරයි.
ඔවුන් සතුව තිබූ, නිදන් හෑරීමට උපයෝගි කරගත්, උදලු තුනක්, කුළු ගෙඩි තුනක්, පූජා භාණ්ඩ කිහිපයක්, යකඩ කූරු තුනක්, විශේෂ කාර්ය බළකාය මගින් අත්අඩංගුවට ගෙන පොලිසියට ඉදිරිපත් කර ඇති බව වාලච්චේන පොලිස් ස්ථානාධිපති ප්‍රධාන පොලිස් පරීක්ෂක ලසන්ත බණ්ඩාර මහතා අප කළ විමසීමකදී සඳහන් කළේය.
සැකකරුවන් සිවිල් ආරක්ෂක බළකායේ වැලිකන්ද රිදීපොකුණ මූලස්ථානයට අයත් බව කියන බොලෙරෝ
වර්ගයේ කැබ් රථයකින් සිවිල් ආරක්ෂකයින් කිහිප දෙනෙකු විසින් වාලච්චේන ඕමනියාමඩු ප්‍රදේශයේ නිදන් හාරන ස්ථානයට ගෙනවිත් දැමූ බවට එක් සැකකරුවකුත් පොලිසියට කරුණු ඉදිරිපත් කර ඇති බව ද පරීක්ෂණ සිදුකරන වාලච්චේන පොලිසිය සඳහන් කරයි.
සිවිල් ආරක්ෂක බළකායේ පොලොන්නරුව මූලස්ථානය කාර්යාලයේ නිල නිවසක නතර වී නිදන් ජාවාරම්කරුවන් බළකායට අයත් රථයකින් වාලච්චේන ඕමනියාමඩු ප්‍රදේශයට රැගෙන ගිය බවට කියන සිද්ධිය සම්බන්ධ අප එහි අණදෙන නිලධාරි ලුතිනන් කර්නල් ඩී. ජේ. එස්. එල්. පොන්වීර මහතාගෙන් දුරකතන‍යෙන් කළ විමසීමකදී ඔහු සඳහන් කළේ තමන් එවැනි සිද්ධියක් නොදන්නා බවත්, එවැනි සිද්ධිවලට තමන් සම්බන්ධ නැති බවයි.
අත්අඩංගුවට ගත් සැකකරුවන් ඇතුළු නිදන් හෑරීමට උපයෝගි කරගත් උපකරණ වාලච්චේන මහේස්ත්‍රාත් අධිකරණයට ඉදිරිපත් කිරීමට නියමිත බවද වාලච්චේන පොලිසිය සඳහන් කරයි.
