ඉඩම් ඔප්පුවක් ලියාපදිංචි කිරීමේදී රජයට ගෙවිය යුතු හිඟ මුද්දර ගාස්තු අඩු කිරීම සඳහා පොලිස් නිලධාරියකුගෙන් රුපියල් 35,000ක අල්ලසක් ගත් බව පිළිගත් සබරගමු පළාත් සභාවේ ආදායම් දෙපාර්තමේන්තුවේ ජ්‍යෙෂ්ඨ තක්සේරු නිලධාරිනියකට කොළඹ මහාධිකරණය ඊයේ (11) අවුරුදු 2ක බරපතළ වැඩ සහිත අත්හිටුවූ සිරදඬුවමක් නියම කළේය.
අදාළ නිලධාරිනිය නඩුව ආරම්භයේදීම වරද පිළිගැනීම හා පෙර චෝදනා නැති වීම සැලකිල්ලට ගෙන ලිහිල් දඬුවමක් නියම කරන බව විත්තිකාරියට එරෙහි දඬුවම් නියම කරමින් කොළඹ මහාධිකරණ විනිසුරු නවරත්න මාරසිංහ මහතා කියා සිටියේය.
සබරගමුව පළාත් සභාවේ ආදායම් දෙපාර්තමේන්තුවේ කෑගල්ල කාර්යාලයේ ජ්‍යෙෂ්ඨ තක්සේරු නිලධාරිනිය ලෙස සේවය කරමින් එහි සේවය ලබා ගැනීමට පැමිණි තැනැත්තකුගෙන් 2021 වසරේ පෙබ: 15දා හෝ ඊට ආසන්න දිනයකදී තුටු පඬුරක් ගැනීමෙන් අල්ලස නමැති වරද සිදු කිරීම යටතේ අල්ලස් හෝ දූෂණ කොමිසම මඟින් 2013 වසරේ ජූනි 9 වැනිදා නඩු පැවරීය.
1965 අංක 02, 1989 අංක 15 දරන පනත්වලින් සංශෝධිත අල්ලස් පනතේ 19 වැනි වගන්තිය යටතේ විත්තිකාරියට එරෙහිව අධි චෝදනා 8ක් ගොනු කෙරිණ.
විත්තිකාරියට එරෙහිව ඉදිරිපත් වූ චෝදනා 8 සඳහා එක් චෝදනාවකට රුපියල් 4,000 බැගින් රුපියල් 32,000ක දඩයක් නියම කෙරිණි. එම මුදල් නොගෙවන්නේ නම් එක් එක් චෝදනාවට මාස 8ක සිරදඬුවමක් නියම කළේය. මෙයට අමතර විත්තිකාරිය තුටු පඬුර ලෙස ලබාගත් රුපියල් 35,000ක මුදල දඩ මුදලක් ලෙස රජයට ගෙවන ලෙස හා ඇඟිලි සලකුණු ගන්නා ලෙස නියම කරන ලදි. විත්තිකාරිය ඊයේ (11) මුළු දඩ මුදල ගෙව්වාය.
අල්ලස් හෝ දූෂණ කොමිසමේ සහකාර අධ්‍යක්ෂ ජනරාල් දිස්නා ගුරුසිංහ පැමිණිල්ල වෙනුවෙන් පෙනී සිටි අතර ජනාධිපති නීතිඥ නලින්ද ඉන්ද්‍රතිස්ස විත්තිය වෙනුවෙන් පෙනී සිටියේය.
