මෑතකදී මුහුණදුන් ආර්ථික අභියෝග හමුවේ ඉලක්ක සහ අරමුණු සාක්ෂාත් කර ගැනීමෙහිලා ශ්‍රී ලංකාව අත්කර ගෙන තිබෙන ප්‍රගතිය සම්බන්ධයෙන් මෙරටට පැමිණ සිටින ජාත්‍යන්තර මූල්‍ය අරමුදලේ නියෝජිත කණ්ඩායමේ විශේෂ අවධානය යොමුව තිබේ.
සංචාරයක් සඳහා ශ්‍රී ලංකාවට ඊයේ (11) පැමිණි ජාත්‍යන්තර මූල්‍ය අරමුදලේ කාර්ය මණ්ඩල නියෝජිත කණ්ඩායම ශ්‍රී ලංකා රජය සමඟ සාකච්ඡා ආරම්භ කරමින් ඊයේ පෙරවරුවේ මුදල් අමාත්‍යාංශය සහ ශ්‍රී ලංකා මහ බැංකු නියෝජිතයන් සමඟ සාකච්ඡා පැවැත්වීය.
එයින් අනතුරුව ජනාධිපති රනිල් වික්‍රමසිංහ මහතා හමුවූ ජාත්‍යන්තර මූල්‍ය අරමුදලේ නියෝජිත කණ්ඩායම කඩාවැටීමට ලක්ව තිබූ ශ්‍රී ලංකා ආර්ථිකය ප්‍රතිසංස්කරණය කිරීමෙහිලා ගෙන තිබෙන ක්‍රියාමාර්ග, ඒවායේ ප්‍රගතිය මෙන්ම තවදුරටත් ක්‍රියාත්මක කළ යුතු වැඩසටහන් සම්බන්ධයෙන් අවධානය යොමු කළ බව මුදල් අමාත්‍යාංශය පවසයි.
මෙම සාකච්ඡා ඉතා සුහදව පැවැති අතර ජනාධිපතිවරයා සහ ජාත්‍යන්තර මූල්‍ය අරමුදලේ නියෝජිත කණ්ඩායම අතර පැවැති සාකච්ඡාවලදී මෙතෙක් ක්‍රියාත්මක කර තිබෙන වැඩසටහන් සම්බන්ධයෙන් දීර්ඝ පැහැදිලි කිරීමක් කර තිබේ. ඊට අමතරව වගකිව යුතු රජයක් ලෙස වත්මන් රජය ගෙන තිබෙන ක්‍රියාමාර්ග, ජනතාවගේ ජීවන මට්ටම ඉහළ නැංවීම සඳහා ක්‍රියාත්මක කර තිබෙන ආර්ථික ප්‍රතිසංස්කරණ වැඩසටහන් මෙන්ම ඉදිරි අය වැය යෝජනා ක්‍රියාත්මක කරන ආකාරය සම්බන්ධයෙන් ද ජනාධිපති රනිල් වික්‍රමසිංහ මහතා කරුණු දක්වා තිබේ.
මෙරටට පැමිණි ජාත්‍යන්තර මූල්‍ය අරමුදලේ නියෝජිත කණ්ඩායම එළඹෙන 19 වැනිදා දක්වා මෙරට රැඳී සිටින අතර එම කාලයේදී රජයේ ඉහළ පෙළේ නියෝජිතයන් සමඟ තවදුරටත් සාකච්ඡා කරන බව ද ජාත්‍යන්තර මූල්‍ය අරමුදලේ ණය පහසුකම් ලැබීමත් සමඟ මෙරට ආර්ථික ප්‍රතිසංස්කරණ ක්‍රියාවලිය අධ්‍යයනය කිරීම සිදු කිරීමට නියමිත බව ද මුදල් අමාත්‍යාංශය සඳහන් කරයි.
එම සාකච්ඡාවලදී විස්තීරණය ණය පහසුකම යටතේ මෙරටට ලැබීමට නියමිත ජාත්‍යන්තර මූල්‍ය අරමුදලේ ණය පහසුකම සහ ඉදිරි ආර්ථික ප්‍රතිසංස්කරණ ක්‍රියාවලිය පිළිබඳ වැඩි අවධානයක් යොමු කිරීමට ද නියමිතව තිබේ.
