නවක වදය ලබාදීමේ සිද්ධියක් සම්බන්ධයෙන් විශ්වවිද්‍යාල පාලනාධිකාරිය මඟින් පන්ති තහනම් කරනු ලැබීම නිසා විභාගයට පෙනී සිටීමට අවස්ථාව නොලැබූ බව කියන පේරාදෙණිය විශ්වවිද්‍යාලයේ කළමනාකරණ පීඨයේ දෙවන වසරේ සිසුවකු වේදනා නාශක ඖෂධ අධි මාත්‍රාවක් පානය කිරීම හේතුවෙන් ප්‍රතිකාර සඳහා පෙරේදා (10) දහවල් පේරාදෙණිය ශික්ෂණ රෝහලට ඇතුළත් කර තිබේ.
මෙම සිසුවා ඇතුළු සිසුන් 10 දෙනකුට නවක වදය ලබාදීමේ සිද්ධියක් මුල්කර ගනිමින් විශ්වවිද්‍යාල පාලනාධිකාරිය මඟින් වසර දෙකක පන්ති තහනමක් පනවා තිබූ බවත් ඉන් මාස 07ක කාලයක් ගත වූ පසු අදාළ දඬුවම වසරක කාලයක් සඳහා අත්හිටුවූ දඬුවමක් බවට පත් කළ බවත් පේරාදෙණිය විශ්වවිද්‍යාලයේ මාධ්‍ය ප්‍රකාශක, නියෝජ්‍ය උපකුලපති මහාචාර්ය ටෙරන්ස් මදුජිත් මහතා කීය.
පන්ති තහනම හේතුවෙන් මෙම සිසුවා මාස 07ක කාලයක් පන්තිවලට සහභාගි වී නොතිබීම මත ඔහුට දෙවන වසරේ විභාගයට පෙනී සිටීමට කළමනාකරණ පීඨය අවස්ථාව ලබා දී නැත.
විශ්වවිද්‍යාලයෙන් පිටත නවාතැනක සිටියදී වේදනා නාශක අධි මාත්‍රාවක් ලබාගත් සිසුවා ප්‍රතිකාර සඳහා පේරාදෙණිය ශික්ෂණ රෝහලට ඇතුළත් කර තිබෙන අතර විභාගයට පෙනී සිටීමට අවස්ථාව ලබා නොදීම නිසා මොහු මෙම වේදනා නාශක පානය කළේ ද යන්න තහවුරුව නැතැයි මධුජිත් මහතා කීය.
විභාගය ලිවීමට අවස්ථාව ලබා නොදී සිසුන් අපහසුතාවට පත් කිරීමට විරෝධය දක්වමින් කළමනාකරණ පීඨ ශිෂ්‍ය සංගමය මඟින් ඊයේ (11) කළමනාකරණ පීඨය ඉදිරිපිට විරෝධතාවක් පැවැත්වීය.
විවිධ චෝදනා සම්බන්ධයෙන් වරදකරු වීම නිසා විභාගය ලිවීමට අවස්ථාව නොලබන සිසුන්ට විභාගය ලිවීමට අවස්ථාව ලබා දෙන්නේ ද නැද්ද යන්න සම්බන්ධයෙන් තීරණයක් ගැනීමට අද (12) කළමනාකරණ පීඨ මණ්ඩලය රැස්වීමට නියමිතය.
