රෝහල්වල දෛනික කටයුතු පවත්වාගෙන යෑමට අවශ්‍යතාව පරිදි භට පිරිස් යෙදවීමට ආරක්ෂක සේනා ආඥාපතිවරුන්ට යුද හමුදාපතිවරයා උපදෙස් දී තිබේ.
දිවයින පුරා රජයේ රෝහල්වල සුළු සේවක වෘත්තීය සමිති විසින් ඉල්ලීම් කිහිපයක් මුල්කර ගනිමින් ක්‍රියාත්මක කරන වැඩ වර්ජනය හේතුවෙන් අඩාළ වූ රෝහල් කටයුතු බාධාවකින් තොරව පවත්වාගෙන යෑමට සෞඛ්‍ය අමාත්‍යාංශය විසින් යුද හමුදාපති ලුතිනන් ජෙනරාල් විකුම් ලියනගේ මහතාගෙන් කළ ඉල්ලීමකට අනුව මෙලෙස යුද හමුදා භට පිරිස් යොදවා ඇත.
ඒ අනුව බටහිර සහ මධ්‍යම ආරක්ෂක සේනා ආඥාපතිවරුන්ගේ අධීක්ෂණය යටතේ කොළඹ සහ මහනුවර ජාතික රෝහල්, කළුබෝවිල, කරාපිටිය, මහමෝදර, පේරාදෙණිය සහ කුරුණෑගල ශික්ෂණ රෝහල්, මාතර, බළන්ගොඩ, ඇහැළියගොඩ, නාවලපිටිය, බදුල්ල, ගම්පොළ, මීරිගම රෝහල්වල දෛනික කටයුතු බාධාවකින් තොරව අඛණ්ඩව පවත්වාගෙන යෑමට යුද හමුදා භට පිරිස් යොදවනු ලැබූ බව යුද්ධ හමුදාව පවසයි.
මේ වන විට එම රෝහල්වල අවශ්‍යතාව අනුව යුද හමුදාවේ 500කට ආසන්න භට පිරිසක් යොදවා ඇති අතර, හදිසි අවශ්‍යතාවක් වුවහොත් ඒ සඳහා යෙදවීමට අවශ්‍ය භට පිරිස් සූදානම් කරන ලෙසත්, වෘත්තීය ක්‍රියාමාර්ග හේතුවෙන් ජනතාවට සිය දෛනික කටයුතු කිසිදු බාධාවකින් තොරව පවත්වාගෙන යෑමට අවශ්‍ය සියලුම පියවර ගන්නා ලෙසත් යුද හමුදාපතිවරයා ආරක්ෂක සේනා ආඥාපතිවරුන්ට උපදෙස් දී ඇත.
