අපේ රට මුහුණ දුන් ඉතා දුෂ්කර කාලය මගහැර අද වන විට විනිවිද පෙනෙන පැහැදිලි මාර්ගයකට පිවිස සිටින බව සංචාරක රාජ්‍ය ඇමැතිනී ඩයනා ගමගේ මහත්මිය ප්‍රකාශ කළාය. රාජ්‍ය ඇමැතිවරිය මේ බව සඳහන් කළේ පෙරේදා (10) පැවති විශේෂ මාධ්‍ය හමුවකට එක් වෙමිනි.
එහිදී වැඩිදුරටත් අදහස් පළ කළ රාජ්‍ය ඇමැතිවරිය මෙලෙස ද කීවාය. රටේ පවතින මේ ආර්ථික පීඩනය සාමාන්‍යයෙන් මහජනයාට මෙන්ම මටත් බොහෝ තදින් දැනෙනවා. ඒත් අපි මීට වඩා දුෂ්කර කාලයක් මගහැර අද මේ විනිවිද පෙනෙන පැහැදිලි අරමුණු ඔස්සේ ගමන් කළ හැකි මාර්ගයකට පිවිස තියෙනවා.
කාලයක් විදුලිය, ඉන්ධන, ගෑස් අර්බුද හමුවේ අපේ ජන ජීවිත පීඩනයට ගොදුරු වෙමින් සිටියදී රට බේරාගැනීමට නායකත්වය දෙන්නත්, වැටුණු ආර්ථිකය ගොඩගන්නත් රනිල් වික්‍රමසිංහ නම් දේශප‍ාලනයෙන් තෙම්පරාදු වූ අසහාය නායකයා ඉදිරිපත් වුණා. අද වන විට එම අර්බුදවලට තිත තබමින්‍ රට යළි ප්‍රකෘතිමත් ගමන් මාර්ගයකට ගෙන තිබෙනවා.
IMF ණය දෙවන වාරිකය ගනිමින්, ගත් ණය ගෙවීමටත් නව ක්‍රමවේද සලසමින් සිටින මෙවන් නායකයකු නොබෙල් ත්‍යාගයෙන් පිදුම් ලැබිය යුතු බව මගේ මතයයි. මෙවැනි නායකයන් බොහොම විරලයි. සජිත්ගේ ප්‍රතිරූපය හදන්න චමින්ද ගහපු මොන්ටිසෝරි ගැටේ ගැන ජනතාව හොඳින් තේරුම් අරන් ඉන්නවා.
අනුර කුමාර මහතා මේ දවස්වල හරි හරි හීන දකිනවා. සංගීත විශාරද නන්දා මාලනිය මෙවැනි අය වෙනුවෙන්ම ගායනා කළ ගීතයක් තියෙනවා. මගෙ සිහිනය මට දකින්න ඉඩ හරින්න. මගෙ සිහිනෙන් මා මුදන්න ළං නොවන්න. හීන දැකීමේ අයිතිය ඕනෑම අයකුට පොදු දෙයක්. මම කවදාවත් ඒ වගේ රමණීය සුන්දර හීනවලට බාධා කරන්නේ නෑ. ඒත් ඔය මාලිමාවට රිංගලා ඉන්න සීනුකාරයන් කෙටියෙන් කියනවා නම් ජෙවිපි කාරයන් 88/89 කාලයේ රාජ්‍ය දේපොළ මංකොල්ලකෑම්, රාජ්‍ය දේපොළ ගිනිතැබීම් සහ අමානුෂීය මනුෂ්‍ය ඝාතන රැසකට වගකිව යුතුයි.”
