මෙරට සංචාරක ව්‍යාපාරයේ ප්‍රගමනයට දායක වෙමින් 2023 වසරේ නොවැම්බර් මස අග භාගයේ සිට දෙසැම්බර් මාසය දක්වා කාලයේ 6,000කට අධික සංචාරකයන් රැගත් මගී නෞකා 5ක් හම්බන්තොට ජාත්‍යන්තර වරාය (HIP) වෙත පැමිණ තිබේ.
මගීන් 620 දෙනෙකු රැගත් ‘Azamara Journey’ මගී නෞකාව නොවැම්බර් මස 29 වැනි දින වරායට සේන්දු වූ අතර මස්කට් සිට පැමිණි ‘Mein Schiff 5’ සුඛෝපභෝගී නෞකාව මගීන් 2,200ක් රැගෙන 11වැනි දින හම්බන්තොට ජාත්‍යන්තර වරාය වෙත පැමිණියේය. නෞකාවෙන් ගොඩබැසගත් සංචාරකයන් පිරිසක් හම්බන්තොට ජාත්‍යන්තර වරායේ හරිත වරාය සංකල්පයට අනුව විදුලි පාපැදි මගින් හම්බන්තොට ප්‍රදේශයේ සංචාරයක ද නිරත වූහ.
‘Mein Schiff 5’ 2023 තුළ වරායට පැමිණි දෙවන අවස්ථාව මෙය වන අතර, පසුගිය වසරේ මැයි මාසයේ ද සංචාරකයන් රැගෙන වරාය වෙත පැමිණ ඇත. දෙසැම්බර් මස 5 වැනි දින සහ 16 වැනි දිනයන්හි මගීන් 3500ක් රැගෙන ‘Celebrity Millennium’ නෞකාව පැමිණි අතර, 19 වැනි දින මගීන් 498ක් රැගෙන ‘Nautica’ නෞකාව හම්බන්තොට ජාත්‍යන්තර වරායට සේන්දු විය.
මේ වසරේ හම්බන්තොට ජාත්‍යන්තර වරාය වෙත පැමිණ ඇති මගී නෞකා ගණන 22කට ආසන්න වන අතර එයින් බොහොමයක් චෙන්නායිහි කොර්ඩීලියා කෲස් ලයින්ස් (Cordelia Cruise Lines) සමාගම හරහා පැමිණි නැව්ය. ඉන්දියානු සහ ජාත්‍යන්තර සංචාරකයන්ට නිවාඩු පැකේජ පිරිනමන මේ සමාගම 2023 ජුනි සිට සැප්තැම්බර් දක්වා ඔවුන්ගේ ‘Empress’ නෞකාව හරහා ගමන් කීපයක් කර වසර පුරා සංචාරකයන් 7,500ක පමණ පිරිසක් වරායට රැගෙනවිත් ඇත.
