මනුෂ්‍ය පරිභෝජනයට නුසුදුසු පාම් ඔයිල් බහාලුම් පහක් ඉඟුරුකඩේ හන්දිය වෙත රේගු නිලධාරියකු හරහා යොමු කර, ඒවා මුදාහැරීමට කටයුතු කළ බව කියන සිද්ධියේ අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් තවත් රේගු නිලධාරියකු ලබන 17 දා දක්වා රක්ෂිත බන්ධනාගාරගත කිරීමට කොටුව මහේස්ත්‍රාත් තිළිණ ගමගේ මහතා ඊයේ (11) නියෝග කළේය.
ඔහු වෙනුවෙන් පෙනී සිටි නීතිඥ මඬුල්ල සිදු කළ අපේක්ෂිත ඇප ඉල්ලීම ප්‍රතික්ෂේප කළ මහේස්ත්‍රාත්වරයා මේ නියෝගය නිකුත් කළේය. මෙ‍ෙලස රක්ෂිත බන්ධනාගාරගත කෙරුණේ සුනිල් අමරසිංහ නමැති නිලධාරියෙකි. සැකකරුගේ විදේශ ගමන් තහනම් කරන ලෙසත්, ඒ බව ආගමන විගමන පාලක ජනරාල් වෙත ෆැක්ස් මඟින් දන්වා යවන ලෙසත් මහේස්ත්‍රාත්වරයා නියෝග කළේය.
මිනිස් පරිභෝජනයට නුසුදුසු මේ ප්‍රශ්නගත තෙල් බහාලුම් පහ සම්බන්ධයෙන් ප්‍රකාශයක් දෙමින් Blur Chip SL (pvt) ltd නමැති ආයතනයේ හිමිකරු නඩරාජා කණරාජා යන අය ප්‍රකාශයක් දී ඇති අතර මැලේසියාවේ සමාගමක් මඟින් මේ තෙල් බහාලුම් මෙරටට ගෙන්වා ඇති බවත්, ඒ බහාලුම් මුදාගැනීමක් සිදු නොකළ නිසා ඒවා රේගුවෙන් පරීක්ෂා කර ඇති බවත් බී වාර්තාවේ වැඩි දුරටත් සඳහන් කර ඇත. මේ සිද්ධිය සම්බන්ධයෙන් තවත් සහකාර් රේගු අධීකාරිවරුන්, රේගු පරීක්ෂකවරයකු, ආහාර පරීක්ෂකවරයකු, ඒ බහාලුම් පහ මෙරටට ගෙන්වූ බව කියන නියෝජිතයකු සහ ඒවා විකිණූ බවට අත්අඩංගුවට ගත් ව්‍යාපාරිකයකු ඇතුළු පිරිසක් මේ වන විට ඇප මත මුදාහැර ඇති අතර, ඔවුන්ගේ විදේශ ගමන් තහනම් කර තිබේ.
