ව්‍යාපාරිකයකු විදිහට මට බැහැ තනියෙන් ගිහින් මුළු රටම ගොඩ දාන්න. ඒක පවතින ආණ්ඩුවේ වැඩක්. කොහොම වුණත් ඉදිරියේදී ඩී.පී. එඩියුකේෂන් එකට පුළුවන් තොරතුරු තාක්ෂණ රැකියා කලාප ශ්‍රී ලංකාව පුරාම බිහි කරන්න යැයි ඩී. පී. එඩියුකේෂන් නිර්මාතෘ සහ සභාපති ධම්මික පෙරේරා මහතා ප්‍රකාශ කළේය.
ඒ මහතා මේ බව පැවසුවේ තොරතුරු තාක්ෂණ ක්ෂේත්‍රයේ රැකියා දස ලක්ෂයක් ලබාදීමේ ‘ඩී.පී. එඩියුකේෂන් සිලිකන් වැලි අයි. ටී. ඔෆිස්’ වැඩසටහන නිල වශයෙන් තිස්සමහාරාමයෙන් පෙරේදා (10) ආරම්භ කිරීමේ වැඩසටහනට සහභාගී වෙමිනි.
එහිදී ‘ඩී.පී.එඩියුකේෂන් අයි. ටී. කැම්පස්’ ව්‍යාපෘතිය යටතේ ක්‍රියාත්මක ‘ඩී. පී. එඩියුකේශන් සිලිකන් වැලි අයි. ටී. ඔෆිස්’ පළමු මධ්‍යස්ථානය නිල වශයෙන් විවෘත කිරීම තිස්සමහාරාම ප්‍රාදේශීය ලේකම් කොට්ඨාසයේ උද්ධකන්දර රජමහා විහාරස්ථානයේදී, උද්ධකන්දර රජමහා විහාරයේ විහාරාධිකාරී පූජ්‍ය බෙරලිහෙල පදුම ස්වාමීන් වහන්සේගේ අනුශාසකත්වයෙන් ඇරඹුණි.
අයි. ටී. කැම්පස් ව්‍යාපෘතිය තුළින් ශ්‍රී ලංකාවේ ජනිත කිරීමට අපේක්ෂිත තොරතුරු තාක්ෂණ රැකියා මිලියනයක් බිහි කිරීමේ වැඩසටහනට සවියක් වීම ‘ඩී. පී. එඩියුකේෂන් සිලිකන් වැලි අයි. ටී. ඔෆිස්’ ස්ථාපිත කිරීමේ මූලිකම පරමාර්ථයයි. මෙහිදී උද්ධකන්දර රජමහා විහාරයේ ස්ථාපිත කර ඇති ඩී. පී. එඩියුකේෂන් අයි. ටී. කැම්පස්හි ඉගෙනුම ලැබූ සිසුන් 20 දෙනකු අළුතින් ස්ථාපිත කරන ලද සිලිකන් වැලි අයී. ටී. ඔෆිස්හි ‘ ෆුල් – ස්ටැක් ඩිවලොපර්’ තනතුරෙහි රැකියාගත කිරීමද ධම්මික මහතා විසින් සිදු කරන ලදි.
මෙහි ප්‍රධාන දේශනය පවත්වමින් ඩී. පී. එඩියුකේෂන් නිර්මාතෘ සහ සභාපති ධම්මික පෙරේරා මහතා මෙසේද පැවසීය.
“මේ ස්වාමීන් වහන්සේ දිනකට පැය 16ක්ම ළමයි වෙනුවෙන් කැපවෙලා තියෙන්නේ. මොකද මම එහෙම කියන්නේ මේ අපේ ඩී. පී. එඩියුකේෂන් කැම්පස් එක දිනකට පැය 16ක් ඇරලා තියෙන්නේ. එහෙම කරලා තමයි ස්වාමීන් වහන්සේ මේ ප්‍රදේශයේ ළමුන්ට ඉගෙන ගන්න අවස්ථාව හදල දීල තියෙන්නේ. ඒකෙ ප්‍රතිඵල විදිහට අද මට පුළුවන් වුණා ළමුන් 20 දෙනකුට රැකියාවන් ලබා දෙන්න. ලෝකයේ දැන් යන විදිහත් එක්ක විශ්වවිද්‍යාල අවුරුදු තුන හතර කියන ඒවා, වෘත්තීය පුහුණු අවුරුදු තුන හතර කියන ඒවා ඉදිරියේදී අඩු වෙනවා. මොකද කියනව නම් අවුරුදු 18 සම්පූර්ණ වුණු ළමයකුට ඒ තරම් කාලයක් ඒ සඳහා යෙදෙන එක අමාරුයි. දැන් තියෙන ආර්ථිකයත් එක්ක දෙමාපියන්ටත් එතරම් කාලයක් ළමයකුට අවශ්‍ය පහසුකම් සලසන්න අමාරුයි. දැන් ඉන්දියාව වගේ රටවල්වල වෘත්තීය පුහුණුව මාස 6ත් 8ත් අතර කාලයකින් අවසන් කරන්න ඕන කියල නීති හදලා තියෙන්නෙ.
ඒ ගැන හිතල තමයි මම ඩී. පී. එඩියුකේෂන් කැම්පස් එක හදනකොටම එහි ඉගෙන ගන්න ළමුන්ට මාස 6ත් 9ත් අතර කාලයේදී රැකියා සඳහා යාමට අවශ්‍ය දැනුම කුසලතා ලබා දෙන්නේ. ඒ අනුව ඒ පාඨමාලා හදාරපු වයස සම්පූර්ණ වූ ළමුන්ට අවශ්‍ය රැකියා ලබා දෙන්න මට පුළුවන්. උදාහරණයකට ගත්තොත් අද මේ රැකියා ලබන ළමුන් 20 දෙනා මේ කැම්පස් එකත් සමඟ එකතුවෙන්නේ 2023 පෙබරවාරි, මාර්තු වගේ කාලවල. එහෙම ආපු ඔවුන් මාස 09කට පස්සේ අද රැකියා ලබා ගන්නවා. ශ්‍රී ලංකාවේ පාසල් දස දහසක ගණන් ඉගැන්නුවට, ඒ ලෙවෙල්වලදී ගණන් උගන්වන්න තියෙන්නෙ පාසල් 550යි. එතකොට තියෙන මතයක් තමයි ගණිතය බැරි නම් අයි. ටී. කරන්න බැහැ කියන මතය.
අපි ඒ මතය සම්පූර්ණයෙන්ම ඉවත් කරලා තියෙන්නෙ, ඕනම කෙනකුට ඇවිත් මේ අපේ කැම්පස් තුළ ඉගෙන ගන්න අවස්ථාව සලසල දීලා. රට සංවර්ධනය කරා ගෙනයන්න නම් අපිට ඩොලර් අවශ්‍යයි. ඒ ගැන හිතල තමයි අපි සැලසුම් කළේ “තොරතුරු තාක්ෂණ රැකියා කලාප” බිහි කරන්න. තොරතුරු තාක්ෂණ රැකියා කලාපයේ පළමුවන කාර්යාලය තමයි අපි දැන් මේ විවෘත කළේ. ඒ කියන්නේ ඉදිරියේදී මේවගෙන් රටට එන්නේ ඩොලර්. අද මේ ප්‍රාදේශීය ලේකම් කොට්ඨාසෙම ඩී. පී. එඩියුකේෂන් කැම්පස් තුනක් විවෘත කරල තියෙන්නේ. ඉදිරියේදී තවත් තුනක් මේ ප්‍රදේශයේම විවෘත කරන්න මම බලාපොරොත්තු වෙනවා. එතකොට තොරතුරු තාක්ෂණ රැකියා කලාප බිහි කරන්න අපිට පහසු වෙනවා.
ව්‍යාපාරිකයෙක් විදිහට මට බැහැ තනියෙන් ගිහින් මුළු රටම ගොඩදාන්න. ඒක පවතින ආණ්ඩුවේ වැඩක්. කොහොම වුණත් ඉදිරියේදී ඩී. පී. එඩියුකේශන් එකට පුළුවන් තොරතුරු තාක්ෂණ රැකියා කලාප ශ්‍රී ලංකාව පුරාම බිහි කරන්න. මේ තුළින් අපිට පුළුවන් ඩොලර් ප්‍රශ්නයට විසඳුමක් දෙන්න.
සමාජයට යම් දෙයක් කරන්න ඕන කියල හිතන කොටසකුත් මේ සමාජය තුළ ඉන්නවා. එහෙම අය තමයි අද මේ අපි දුන්න රැකියා 20 හොයාගන්න උදව් කළේ. මගේ හීනයක් තමයි තොරතුරු තාක්ෂණයට අදාළ රැකියා දස ලක්ෂයක් හදන එක. අද වෙනකොට ළමයි දෙලක්ෂ තිස්දහසක් ඉගෙන ගනිමින් ඉන්නවා තොරතුරු තාක්ෂණය සම්බන්ධව. IT කැම්පස් දිවයින පුරා 120ක් මේ වෙනකොට විවෘත කරල තියෙනවා. තව අවුරුදු කිහිපයක් යනකොට තොරතුරු තාක්ෂණ රැකියා කලාප හරහා රටට ඩොලර් ගේන එක එච්චර ලොකු දෙයක් වෙන එකක් නැහැ. මේ මුදල් ගමට ආවොත් විතරයි සුළු ව්‍යාපාර කියන ඒවා ගමේ රැඳී පවතින්නේ. අද වන විට සුළු ව්‍යාපාර නැතිවෙමින් පවතින්නේ. එයට හේතුව ගම තුළට මුදල් ගලා නොඒම. ඒකට එකම උත්තරය තමයි ගම තුළ රැකියා බිහි කරලා මුදල් ගමට එන්න සැලැස්වීම. ඒක අපිට කරන්න පුළුවන්. මම ඒක දැන් කරලා පෙන්නුවා. අද මේ රැකියා ගත්ත ළමයි කොහොමද මෙහේ ඉඳන් කැනඩාවේ තියෙන කම්පැනියක වැඩ කරන්නේ කියලා.”
තිස්සමහාරාම ප්‍රාදේශීය ලේකම් කොට්ඨාසයේ මධ්‍යස්ථාන හයක ව්‍යාපෘති සියය සම්පූර්ණ කළ සිසුන් සඳහා සහතික පත්‍ර ලබා දීමක්ද ධම්මික මහතා විසින් සිදු කරන ලදි.
ඉදිරි වසර තුනක කාලය තුළ සියලුම ප්‍රාදේශීය ලේකම් කොට්ඨාස ආවරණය වන අයුරින් නවීන පරිගණක 7000කින් සමන්විත වන පරිදි ‘ඩී. පී. එඩියුකේෂන් අයි. ටී. කැම්පස්’ විවෘත කිරීම ධම්මික පෙරේරා මහතාගේ අපේක්ෂාවයි. එමෙන්ම 2028 වර්ෂය වන විට ශ්‍රී ලංකාවේ තරුණ කේතකරුවන් මිලියනයක් බිහි කර, එමඟින් ඩිජිටල් ආර්ථිකයක් ගොඩනැඟීමත්, තාක්ෂණික දැනුම ඇති ගෝලීය වශයෙන් තරඟකාරී ශ්‍රී ලාංකිකයන් පිරිසක් බිහි කිරීමත්, ඉහළ වැටුප් හිමි රැකියා ක්ෂේත්‍ර ගණනාවක් සඳහා ප්‍රවේශවීමේ දොරටු විවෘත කිරීමත් ධම්මික මහතා මේ වැඩසටහන් ක්‍රියාත්මක කිරීමෙන් බලාපොරොත්තු වේ.
මේ අවස්ථාව සඳහා ඩී. පී. එඩියුකේෂන් ප්‍රධාන විධායක නිලධාරිනි කව්ෂි අමරසිංහ මෙනෙවිය සහ සීමාසහිත ඇඩ්වෙන්ටා ටෙක්නොලොජීස් පුද්ගලික සමාගමේ සම නිර්මාතෘ උදාන වික්‍රමසිංහ මහතා ඇතුළු පිරිසක්ද එක්ව සිටියහ.
