– මරණ තුනයි: පූර්ණ නිවාස හානි 06ක්:
– අර්ධ නිවාස හානි 318ක්:ආරක්ෂිත ස්ථානවල 4981ක්
– දිස්ත්‍රික්ක 8කට අනතුරු ඇඟවීම තවදුරටත්
අයහපත් කාලගුණ තත්ත්වය හේතුවෙන් මාර්ග ජලයෙන් යටවීම්, පස් කණ්ඩි කඩා වැටීම්, නායයාම්, ගස් කඩා වැටීම් ආදී ආපදා තත්ත්වයන් හේතුවෙන් දිස්ත්‍රික්ක 13ක පවුල් 33687ක පුද්ගලයෝ 109635ක් බලපෑමට ලක් වී ඇති බව ඊයේ(11) පෙරවරු 9.00ට ආපදා කළමනාකරණ මධ්‍යස්ථානය නිකුත් කළ වාර්තාවේ සඳහන් වේ. අපදා හේතුවෙන් මියයාම් සංඛ්‍යාව 02ක් බවත් තුවාල වු සංඛ්‍යාව 01ක් බවත් එහි දැක්වේ. පූර්ණ නිවාස හානි 06කි.අර්ධ නිවාස හානි 318කි. ආරක්ෂිත ස්ථාන 31ක පවුල් 1587ක පුද්ගලයෝ 4981ක් සිටින බවද එහි දැක් වේ. ජලාශ ගණනාවක් පිට වාන් දමමින් පවතින හෙයින් ඒ පිළිබඳව ජනතාව සැලකිලිමත්විය යුතු බව වාරිමාර්ග දෙපාර්තමේන්තුව සඳහන් කරයි. වැසි තත්ත්වය හේතුවෙන් බදුල්ල, ගාල්ල, මහනුවර, මාතලේ, මාතර, මොනරාගල, නුවරඑළිය, රත්නපුර දිස්ත්‍රික් සඳහා ජාතික ගොඩනැඟිලි පර්යේෂණ සංවිධානය නායයාම් පිළිබඳව අනතුරු ඇඟවීමේ පළමු සහ දෙවෙනි අදියරේ නිවේදන අද (12) පස්වරු 3.00 දක්වා වලංගු වන පරිදි නිකුත් කර ඇත.
– සොරබොර වැවේ වම් ඉවුර උඩුගම් බලා පිටාර ගලයි
– සේනානායක සමුද්‍රය වාන් දැමීමෙන් අම්පාරේ පවුල් 15000ක් අවතැන් අම්පාර දිසාපති
– මල්වතු ඔය, යාන් ඔය සහ කලා ඔය දෙපස සිටින්නන් දැඩි විමසිල්ලෙන් සිටින්න
– බදුල්ල කොළඹ මාර්ගය මුළුමනින්ම වසයි
– ගොවි ගම්මාන අටක් ජලයෙන් යටවෙයි
– නාච්චාදූව ජලාශයේ වැඩි ජලය නුවර වැවට
– පරාක්‍රම සමුද්‍රයේ වාන් දොරටු දහයම අරී
– වැලිකන්ද සිට පූනානි දක්වා ස්ථාන කීපයක් ගංවතුරෙන් යටවීමෙන් වාහන ගමනට බාධා
ලුණම – සනත් ගමගේ, ඇළහැර සරත් වෙලගෙදර, මාපාකඩවැව සමූහ – එච්. එම්. රංජිත් කරුණාවීර, තිස්සමහාරාම ප්‍රා: වා: අමිල සම්පත් ශ්‍රී, දිගාමඩුල්ල විශේෂ – වසන්ත චන්ද්‍රපාල, ඌව පළාත් සමූහ ප්‍රසන්න පත්මසිරි,සූරියවැව සමූහ පරාක්‍රම ගුණසේකර, සිරිපුර මදුශානි අබේසිංහ, අනුරාධපුර සංචාරක – සශිනි මධුෂානි
අයහපත් කාලගුණික තත්ත්වය හේතුවෙන් දිස්ත්‍රික්ක 11ක පවුල් 3000කට අයත් පුද්ගලයන් 11000 කට අධික පිරිසක් ආපදාවට පත්ව තිබේ. මහියංගණ සොරබොර වැවේ වම් ඉවුර උඩුගම් බලා පිටාර ගැලීම නිසා නිවාස 23ක් ගංවතුරින් යට වී තිබේ. කිරින්දට ආසන්න පහත්බිම් රැසක් ද ජලයෙන් යටවීම නිසා පවුල් 400ක් පමණ අවතැන්ව තිබේ.
අම්පාර දිස්ත්‍රික්කයේ ඉඟිනියාගල සේනානායක සමුද්‍රය මේ වන විටත් අඩියක් පමණ වාන් දමන අතර මේ නිසා ඇති වූ ගංවතුර තත්ත්වයෙන් පවුල් 15000ක් අවතැන්ව ඇතැයි අම්පාර දිසාපති චින්තක අබේවික්‍රම මහතා පැවසීය.
මේ වන විට අනුරාධපුර දිස්ත්‍රික්කයට නොකඩවා ඇද හැලෙන මහවැසි හේතුවෙන් අනුරාධපුර නගරයට සහ පූජා නගරයට ඇති වන ගංවතුර තත්ත්වය මඟ හැරීමට මේ වනවිට අවශ්‍ය පියවර ගෙන තිබුණ ද මල්වතු ඔය, යාන් ඔය සහ කලා ඔය දෙපස සිටින ජනතාව දැඩි විමසිල්ලෙන් සිටින ලෙස, අනුරාධපුර දිස්ත්‍රික් වාරිමාර්ග අධ්‍යක්ෂ කාර්යාලය නිවේදනයක් නිකුත් කරමින් සඳහන් කළේය. නාච්චාදූව ජලාශයෙන් තප්පරයට ඝන අඩි 1200ක් පමණ නුවර වැවට ජලය මුදා හරින බවත්, එය නාච්චාදූව ජලාශයෙන් කෙළින්ම මල්වතු ඔයට, මුදා හැරීම වෙනුවට නාච්චාදූව ජලාශය මඟින් නුවර වැවට නිකුත් කර අනුරාධපුර නගරයට පහළින් මල්වතු ඔය හරහා එම ජලය මුදා හරිමින් අනුරාධපුර පූජා නගරයට ඇති වන අවදානම් තත්ත්වය මඟ හැරීමට කටයුතු කර ඇති බව අනුරාධපුර දිස්ත්‍රික් මහා වාරිමාර්ග අධ්‍යක්ෂ කාර්යාලය වැඩිදුරටත් පවසයි.
ඊයේ (11) දහවල් වන විට පරාක්‍රම සමුද්‍රයේ වාන් දොරටු 10ම අඩි දෙකක් බැගින් විවෘත කර තිබූ අතර තත්පරයට ඝන අඩි 2500ක ජල ධාරිතාවක් පිටවන බව බව පොලොන්නරුව වාරිමාර්ග ඉංජිනේරු කාර්යාලයේ නිලධාරියෙක් පැවසීය. පොලොන්නරුව මාදුරුඔය කුඩාඔය පිටාර ගැලීම හේතුවෙන් පොලොන්නරුව මඩකලපුව ප්‍රධාන මාර්ගයේ වැලිකන්ද සිට පූනානි දක්වා ස්ථාන කීපයක් ප්‍රධාන මාර්ගයේ ගංවතුරෙන් යටවීම හේතුවෙන් 11වැනිදා සිට සැහැල්ලු වාහන ගමනාගමනයට දැඩි බාධා එල්ල වී තිබේ.
මේ වනවිට වැලිකන්ද නාමල්ගම, පුල්ලියාරඅඩ්, ජයන්ති යාය, පූනානි ප්‍රදේශවල ස්ථාන තුනකින් පමණ අඩි දෙකහමාරක් පමණ ප්‍රධාන මාර්ගය ජලයෙන් යට වී පවතින බව ජාතික ආපදා සහන සේවා මධ්‍යස්ථානයේ පොලොන්නරුව දිස්ත්‍රික් ආපදා සහන සේවා නිලධාරී පාලිත උපුල් කුමාර මහතා සඳහන් කළේය.
හම්බන්තොට දිස්ත්‍රික්කයේ පමණක් පුද්ගලයන් 2492ක් අවතැන්ව ඇතැයි හම්බන්තොට දිස්ත්‍රික් ලේකම් එච්. පී. සුමනසේකර මහතා කීය. ලුණුගල බිබිල ඒ 5 ප්‍රධාන මාර්ගයට අරවාකුඹුර ප්‍රදේශයේදී මාර්ගයට ඉහළින් තිබූ විශාල ගල් පර්වත හා පස් කඳු කඩා වැටී මාර්ගය පෙරේදා (10 ) සම්පූර්ණයෙන්ම වැසී ගොස් තිබෙන බව පොලිසිය කියයි. ප්‍රදේශයේ පවතින අධික වර්ෂාවත් සමඟ පසුගිය දින කීපය පුරාම නායයෑම් සිදු වී මාර්ගය අදට දින පහක් වසා තබා පාර ප්‍රතිසංස්කරණ කටයුතු කරමින් සිටින අතරතුර 10 වැනි දින රාත්‍රී විශාල කඳු නායයෑම නිසා මාර්ගය මීටර් 50ක් පමණ වැසී යෑමත් සමඟ මාර්ගයේ ගමනාගමනය මුළුමනින්ම වසා තැබීමට පොලිසිය කටයුතු කර තිබේ.
දින කීපයක් තිස්සේ පවතින වැසිබර කාලගුණයත් සමඟම කිරිඳිඔය සහ ප්‍රදේශයේ වැව් පිරී ඉතිරී යෑමෙන් ඊයේ (10) සිට ගොවි ගම්මාන අටක් ජලයෙන් යටවෙමින් තිබිණි.
සිරියාගම,කෝන්වැලෑන, හල්මිල්ලයාය, මාගම, විහාරමහාදේවීපුර, රණකෙලිය සහ පට්ටියපොළ ගම්මාන ජලයෙන් යටවෙමින් පැවතිණි. මේ ගම්මානවල පදිංචි පවුල්වලට පහසුකම් සලසමින් පිසූ ආහාර පාන සැපයීමට තිස්සමහාරාම ප්‍රාදේශීය ලේකම් කාර්යාලය පියවර ගෙන තිබිණි.
දිඝවාපි පුදබිම සහ අග්නි දිග සරසවිය ජලයෙන් යටවෙයි
ගංවතුර තත්වයත් සමඟ දිඝවාපි පුදබිම ජලයෙන් යටවී ඇති බව දිඝවාපි විහාරාධිපති මහඔය සෝභිත හිමියයෝ පැවසූහ. දැනට විහාරස්ථානය වටා සහ එන මාර්ගය දේවාලය ඉදිකරන චෛත්‍යය වටා වතුර එක් රැස් වී තිබේ. ස්වාමින් වහන්සේලා වැඩ සිටින ආවාස ගෙය ජලයෙන් යට වී නැත.දැනට විහාරස්ථානයේ නායක හිමියන් ඇතුළු පස් නමක් වැඩ සිටින අතර ගංවතුර තත්ත්වය මත වුවද දානය විහාරස්ථානයට ලැබෙන බව ද උන් වහන්සේ පැවසූහ. දීඝවාපි විහරස්ථානයේ ඇති පොලිස් මුරපොළ ජලයෙන් යට වී ඇති අතර සතර මහා දේවාලය සහ බෝධියේ කොටසක් ජලයෙන් යට වී තිබේ.අග්නි දිග විශ්වවිද්‍යාලය ද ජලයෙන් යට වී තිබේ. මේ නිසා ඔලුවිල් මණ්ඩපයේ සිසුන්ට ඉකුත් 5දා සිට නිවාඩු ලබාදීමට පාලනාධිකාරිය පියවර ගෙන තිබේ.
