ශ්‍රී ලංකා මහ බැංකුවෙන් තහනම් කර ඇති ‘ඔන්මැක්ස් ඩීටී’ පුද්ගලික සමාගමේ වෙබ් අඩවිය නිර්මාණය කළැයි කියන මෘදුකාංග ඉංජිනේරුවරයා වහාම අත්අඩංගුවට ගෙන අධිකරණයට ඉදිරිපත් කරන ලෙසට නියම කරමින් කොළඹ ප්‍රධාන මහේස්ත්‍රාත් ප්‍රසන්න අල්විස් මහතා ඊයේ (11) වරෙන්තු නිකුත් කළේය.
මෙලෙස වරෙන්තු නිකුත් වූයේ වැලිහේන්පිට පාර, රුක්මලේ, පන්නිපිටිය පදිංචි ‘වී ටෙක්’ මෘදුකාංග ආයතනයේ හිමිකරු වන ගයාන් චාමර වික්‍රමතිලක (31) නමැත්තාටය.
මෙම සිද්ධියට අදාළ නඩුව ඊයේ (11) අධිකරණය හමුවේ කැඳවූ අවස්ථාවේදී සැකකාර මුදුකාංග ඉංජිනේරුවරයා අධිකරණය හමුවේ පෙනී නොසිටීම හේතුවෙන් මෙලෙස වරෙන්තු නිකුත් කෙරිණි.
ඔන්මැක්ස් ඩීටී වෙබ් අඩවිය නිර්මාණය කළ බවට සඳහන් කරමින් අපරාධ පරීක්ෂණ දෙපාර්තමේන්තුව මඟින් මෙම සැකකරු අත්අඩංගුවට ගෙන අධිකරණයට ඉදිරිපත් කරනු ලැබ තිබුණේ ඉකුත් 30 වැනිදාය.
එහිදී අධිකරණයෙන් එම සැකකරු රුපියල් ලක්ෂ විසිපහ බැගින් වූ ශරීර ඇප දෙකක් මත මුදා හැරීමට නියෝග කළේය.
ඇපකරුවන් ළඟම ඥාතීන් විය යුතු බවත් පදිංචිය තහවුරු කළ යුතු බවත් සඳහන් කරමින් ඇප කොන්දේසි පැනවූ අධිකරණය, සැකකරුගේ විදෙස් ගමන් තහනම් කිරීමේ නියෝගයක් ද එදින නිකුත් කළේය.
සෑම මසකම අවසන් ඉරු දින පෙරවරු 9ත් – 12ත් අතර කාලයේදී අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසයේ පෙනී සිටින ලෙසට ද සැකකරුට තවත් ඇප කොන්දේසියක් අධිකරණය මඟින් පැනවීය.
එසේ ඇප කොන්දේසි පනවා තිබියදීත් මෙම සැකකරු අපරාධ පරීක්ෂණ දෙපාර්තමේන්තුවේ පෙනී නොසිටි බව ද එම දෙපාර්තමේන්තුව අධිකරණයට දැන්වීය.
ඒ හේතුවෙන් සැකකරුට වරෙන්තුවක් නිකුත් කරන ලෙස ද අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීය. පැමිණිල්ල වෙනුවෙන් අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන කොට්ඨාසය වැඩිදුර වාර්තාවක් ද සමඟින් ඊයේ (11) අධිකරණය හමුවේ පෙනී සිටියේය.
සැකකරු සන්තකයේ තිබී අත්අඩංගුවට ගත් ස්මාට් වර්ගයේ ජංගම දුරකතනයක්, පරිගණක දෘඩාංග හතක්, පරිගණක දත්ත ගබඩා හතරක් ඇතුළු උපාංග කිහිපයක් ශ්‍රී ලංකා පරිගණක හදිසි ප්‍රතිචාර සංසදයට යොමු කර විශ්ලේෂණ වාර්තාවක් කැඳවන ලෙසට නියෝගයක් නිකුත් කරන්නැයි අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීය. ඒ අනුව එම නියෝගය නිකුත් කළ මහේස්ත්‍රාත්වරයා සිද්ධිය සම්බන්ධයෙන් වන නඩුව ලබන පෙබරවාරි මස 15 වැනිදා තෙක් කල් තැබීය.
මෙම සිද්ධියට අදාළ සැකකරුවන් ලෙසින් නීතිපතිවරයා නම් කරන ලද ‘ඔන්මැක්ස් ඩීටී’ පුද්ගලික සමාගමේ අධ්‍යක්ෂවරුන් පස්දෙනා අපරාධ පරීක්ෂණ දෙපාර්තමේන්තුව මඟින් අත්අඩංගුවට ගනු ලැබ තිබුණේ ඉකුත් 2023 වසරේ නොවැම්බර් මස 03 වැනිදාය. පසුව අධිකරණය මඟින් එම සැකකරුවන් රක්ෂිත බන්ධනාගාරගත කිරීමට නියෝග කළ අතර එක් අයකුට රුපියල් ලක්ෂ 100 බැගින් වූ ශරීර ඇප තුනක් මත මුදා හැරීමට අධිකරණයෙන් නියෝග නිකුත් වූයේ ඉකුත් 2023 වසරේ නොවැම්බර් මස 16 වැනිදාය.
මෙලෙස ඇප මත මුදා හරිනු ලැබුවේ ‘ඔන්මැක්ස් ඩීටී’ පුද්ගලික සමාගමේ අධ්‍යක්ෂවරුන් වන කහඳව ආරච්චිගේ අතුල ඉන්දික සම්පත්, ගයාෂාන් අබේරත්න, සම්පත් සඳරුවන්, සාරංග රන්දික ජයතිස්ස සහ ධනංජය ජයාන් යන අයවලුන්ය. ශ්‍රී ලංකා මහ බැංකුවේ මූල්‍ය බුද්ධි ඒකකයේ අධ්‍යක්ෂවරයා කරන ලද පැමිණිල්ලකට අනුව මෙම සිද්ධිය සම්බන්ධයෙන් අධිකරණයට කරුණු වාර්තා කරනු ලැබ තිබුණේ අපරාධ පරීක්ෂණ දෙපාර්තමේන්තුවේ මූල්‍ය වාණිජ අපරාධ විමර්ශන ඒකකය මඟිනි.
බැංකු පනතේ 83 අ (1) වගන්තියට අනුව සහ 2011 අංක 40 දරන පනතේ 2006 අංක 5 මුදල් විශුද්ධිකරණය වැළැක්වීමේ පනතේ 3 වන වගන්තියට අනුව මෙම අයවලුන් සිදු කර ඇත්තේ දඬුවම් ලැබිය හැකි වරදක් බව ද අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කර ඇත.
