අන්තර් සමාජ පළමුපෙළ ලීග් රග්බි තරගාවලියේ කුසලාන වටයේ කණ්ඩායම් හතරට එක්වීමට පොලිස් ක්‍රීඩා සමාජය, යුද හමුදා ක්‍රීඩා සමාජය සහ සීඑච් ඇන්ඩ් එෆ්සී ක්‍රීඩා සමාජය අද සිට තීරණාත්මක තරග කිහිපයකට මුහුණදීමට නියමිතය. මේ වන විට පැවති තරග 4කින් පසු ප්‍රසාද ලකුණු සටහනේ පස්වැනි තැනට පත්වී සිටින යුද හමුදා පිල සහ හයවැනි තැන සිටින පොලිස් පිල අතර තරගය අද පස්වරුවේ පොලිස් පිටියේදී පැවැත්වෙන අතර, ප්‍රසාද ලකුණු සටහනේ සිවුවැනි තැන සිටින සීඑච් පිල ලකුණු සටහනේ 7 වැනි තැන සිටින ගුවන් හමුදා පිල සමඟ හෙට (6) තුරඟ තරග පිටියේදී සටනට එක්වන්නේ සිය ස්ථානය තවදුරටත් තහවුරු කර ගැනීමටය.
සීඑච් පිල මෙතෙක් පැවැති තරග 4කින් දෙකක් ජය ගනිමින් ප්‍රසාද ලකුණු 12ක් ලබා සිටින අතර, යුද හමුදා පිල ප්‍රසාද ලකුණු 8ක් ද, පොලිස් පිල ප්‍රසාද ලකුණු 6ක් ද ලබා පිළිවෙළින් 5 සහ 6 ස්ථානවල පසුවන්නේ එක් තරගයක් පමණක් ජය ගනිමිනි. මේ සති අන්තයෙන් පසු තරග 2 බැගින් අතැතිව සිටින මේ කණ්ඩායම් ත්‍රිත්වයම කුසලාන වටයේ කණ්ඩායම් 4ට එක්වීමේ බලාපොරොත්තු ඉහළ නංවමින් සිටී.
අද තරගයෙන් පසු යුද හමුදාවේ ප්‍රතිවාදීන් වීමට නියමිතව ඇත්තේ ගුවන් හමුදා පිල සහ සීඑච් පිල වන අතර, පොලිස් පිලට ඉතිරි තරග 2දී ගුවන් සහ සීඑච් ප්‍රතිවාදීන් බවට පත්වනු ඇත. ඒ අනුව ඉදිරි තරග 2දී සීඑච් පිලට තරග වැදීමට සිදුවනු ඇත්තේ කුසලාන වටයේ ස්ථානයක් හඹා යමින් සිටින පොලිසිය සහ යුද හමුදාව සමඟ බැවින් කණ්ඩායම් ත්‍රිත්වයටම අද සිට උණුසුම් සහ අභියෝගාත්මක තරග තුනකට මුහුණ දීමට සිදුවනු ඇත.
මේ අතර පැවැති තරග 4ම ජයගත් වත්මන් ලීග් ශූර මහනුවර ක්‍රීඩා සමාජය ලකුණු 24ක් ලබා ප්‍රසාද ලකුණු සටහනේ අපරාජිතව පෙරමුණේ පසුවන අතර, ප්‍රසාද ලකුණු 23ක් ලබා දෙවැනි තැන පසුවන්නේ තරග 4ම ජයගත් අනික් අපරාජිත කණ්ඩායම වන සීආර් ඇන්ඩ් එෆ්සී කණ්ඩායම ය. තුන්වැනි තැන පසුවන්නේ ලකුණු 18ක් ලබා සිටින හැව්ලොක්ස් ක්‍රීඩා සමාජයයි. මහනුවර පිල සහ හැව්ලොක්ස් පිල ලබන 7 වැනිදා නිත්තවෙලදී තරග වදින අතර, සීආර් පිල හෙට පස්වරුවේ මෙතෙක් කිසිදු තරගයක් ජය නොගෙන ප්‍රසාද ලකුණු සටහනේ 8 වැනි තැන සිටින නාවික හමුදා පිල සමඟ වැලිසරදී තරග බිමට පිවිසෙයි.
