සංචාරක පාකිස්තාන ක්රිකට් කණ්ඩායම සමඟ පැවැත්වෙන තෙවැනි ටෙස්ට් තරගයේ දෙවැනි දිනය නිමා වන විට පළමු ඉනිම ක්රීඩා කරන ඔස්ට්රේලියාව කඩුලු 2ක් දැවී ලකුණු 116ක් රැස් කර තිබිණි.
පාකිස්තානය පළමු ඉනිමට ලකුණු 313ක් රැස් කළ අතර, ඒ අනුව කඩුලු 8ක් අතැතිව සිටින ඔස්ට්රේලියාව තවත් ලකුණු 197ක් පසුපසින් සිටී. මානස් ලැබුෂ්චේන් ලකුණු 23ක් සහ ස්ටීව් ස්මිත් ලකුණු 6ක් රැස් කරමින් නොදැවී කඩුල්ලේ රැඳී සිටියහ.
කෙසේ වෙතත් වර්ෂාවෙන් බාධා වීම නිසා ඊයේ ක්රියාත්මක කළ හැකි වූයේ ඕවර 47ක් පමණි.
දිනයේ පළමු කඩුල්ල ලෙස සිය අවසන් ටෙස්ට් තරගයට ක්රීඩා කරන ඩේවිඩ් වෝනර් ලකුණු 34කට දැවී ගිය අතර, උස්මාන් කවාජා දෙවැනි කඩුල්ල ලෙස දැවී ගියේ ලකුණු 47කටය.
පාකිස්තාන පළමු ඉනිම වෙනුවෙන් මොහොමඩ් රිස්වාන් (88), අගා සල්මා (53) සහ ආමර් ජමාල් (82) අර්ධ ශතක රැස් කළ අතර, පන්දු යැවීමේදී පැට් කමින්ස් කඩුලු 5ක් දවා ගත්තේ අඛණ්ඩව කඩුලු 5 බැගින් දවාගත් තෙවැනි අවස්ථාව සටහන් කරමිනි. අද තරගයේ තෙවැනි දිනයයි.