රයිගම්පුර රාජධානියේ ඓතිහාසික හල්තොට ලෙනවර රජමහා විහාරය ආසන්නයේ පිහිටි පෞරාණික වටිනාකමක් ඇති ලෙනවර උයන ප්‍රදේශයේ නිවෙසක් ඉදිරිපිට පැරණි නිවෙසේ මැද සාලයේ බලපත්‍ර නොමැතිව නිදන් හාරමින් සිටි පුද්ගලයින් හත්දෙනෙකු 03 දා අත්අඩංගුවට ගත් බව මිල්ලනිය පොලිසිය පවසයි.
සැකකරුවන් සමඟ නිදන් හෑරීම සඳහා උපයෝගී කරගත් උදලු, අලවංගු, තාච්චි, ගල් ඇදීමට ගන්නා චේන් බොලොක්ක, නිදන් හෑරීමට පෙර එම ස්ථානය වටේට ඇද තිබූ පිරිත් කළ සුදු නූල් ඇතුළු උපකරණ තොගයක් ද පොලිසිය භාරයට ගෙන තිබේ.
නො 187/25 ලෙනවර උයන, හල්තොට ලිපිනයේ ඇති මෙම ඉඩමේ වැසිකිළි වළක් කැපීම සඳහා ගල් කඩා ඉවත් කිරීම සඳහා මිල්ලනිය ප්‍රාදේශීය ලේකම් කාර්යාලයෙන් අනුමැතිය ඉල්ලා ඇති නමුත් මෙතෙක් එවැනි අනුමැතියක් ලබා දී නැතැයි පොලිසිය පවසයි.
මිල්ලනිය පොලිස් ස්ථානාධිපති ප්‍රධාන පොලිස් පරීක්ෂක මහික ද සිල්වා මහතා ඇතුළු නිලධාරින් විශේෂ රාජකාරියේ යෙදී සිටියදී බලපත්‍ර නොමැතිව පුරාවස්තු සෙවීමේ අරමුණින් කැණීම් කටයුතු සිදු කරන බවට ලද තොරතුරකට අනුව මෙම වැටලීම සිදු කර තිබේ.
පොලිස් නිලධාරීන් එම ස්ථානය වටලන විටත් මෙම පිරිස මඩ වතුර සහිත කානුවල බැස ගෙන කැණීම් සිදු කරමින් සිටිය බවත් එක් පුද්ගලයෙකු තණකොළ කැපීම සඳහා පැමිණි බව පැවසූ බවත් පොලිසිය පවසයි.
මෙම නිවැසි පුද්ගලයා පැරණි නිවෙසේ පිටුපසින් අලුතින් නිවෙසක් ඉදිකර ඇති අතර, ඉතිරිව තිබූ පැරණි සාලයේ මෙම කැණීම් සිදු කර ඇති බව පොලිසිය පවසයි.
පිරිත් කරන ලද සුදු නූල්වලින් වටකරන ලද ඉඩමේ අඩි 15ක් පමණ ගැඹුරට වළක් කපමින් සිටි පිරිස පොලිසි‍ෙයන් බේරී පලා යාමට නොහැකිව සිටියදී අතටම අල්ලා ගැනීමට හැකි වී තිබේ.
මෙසේ අත්අඩංගුවට පත් වූයේ හල්තොට ලෙනවර උයන, අඟුරුවාතොට, ඌරුතුඩාව, හල්තොට, ලගාන හා දොඹගොඩ යන ප්‍රදේශවල පදිංචිකරුවන් වේ.
මෙම සැකකරුවන් 04 දා හොරණ අධිකරණයට ඉදිරිපත් කිරීමට නියමිතව තිබුණි.
ඡායරූප – හල්තොට සමූහ
