මුදල් වංචා කළ බව කියන සිද්ධියක් සම්බන්ධව රිමාන්ඩ් භාරයේ සිට ඇප මත පැමිණීමෙන් පසුව රජයේ සාක්කි කරුවෙකුට වෙනත් පුද්ගලයෙකුගේ ජංගම දුරකතනයකට ඇමතුමක් ලබා දෙමින් තර්ජනය කළ බවට සැකකරුවෙකුට එරෙහිව ගොනු කොට ඇති බී වාර්තාවක ගොනුවක් ඉදිරි කටයුතු සඳහා වින්දිතයන් හා සාක්ෂිකරුවන් ආරක්ෂා කිරීමේ නීති කොට්ඨාසයට යැවීමට අත්තනගල්ල අංක 02 මහේස්ත්‍රාත් මංජුල කරුණාරත්න මහතා ඊයේ (04) පස්වරුවේ නියෝග කළේය.
මධ්‍යම අධිවේගී මාර්ගය තැනීමේ කොන්ත්‍රාත් සමාගමකට පස් සැපයීමේ දී විශාල මුදලක් වංචා කර ඇති බව කියමින් කේ. ඩබ්ලිව්. ටී. පී. එන්ටර්ප්‍රයිසස් ආයතනයේ හිමිකරු වන තරංග ප්‍රභාත් වෙලගෙදර නැමැත්තෙකු ප්‍රධාන සැකකරු වශයෙන් නම් කරමින් පෑලියගොඩ විශේෂ අපරාධ විමර්ශන ඒකකය විසින් පැමිණිල්ලක් ගොනු කර ඇත.
එම පැමිණිල්ලට අදාළව ප්‍රධාන සැකකරු රිමාන්ඩ් භාරයේ සිට ඇපමත මුදා හැරීමෙන් අනතුරුව එම සිද්ධිය සම්බන්ධව රජයේ සාක්කිකරුවෙකු වශයෙන් නම් කර සිටින ඉඳුනිල් බණ්ඩාර නැමැත්තෙකුට නුවන් සාලිය නැමැත්තෙකු ගේ ජංගම දුරකතනයක් මඟින් තර්ජනය කළ බව කියන සිද්ධියක් සම්බන්ධව පෑලියගොඩ විශේෂ අපරාධ විමර්ශන ඒකකය වෙනම පැමිණිල්ලක් අධිකරණයට ඉදිරිපත් කර ඇත.
එම පැමිණිල්ල ඊයේ (04) පස්වරුවේ නැවත කැඳවූ අවස්ථාවේ ඇප මත මුදා හැර සිටින ප්‍රධාන සැකකාර තරංග ප්‍රභාත් වෙලගෙදර නැමැත්තා අධිකරණය ඉදිරියේ පෙනී සිටියේය.
