පොලිස් නිලධාරීන් ලෙස පෙනී සිටිමින් වැල්ලවත්ත ප්‍රදේශයේ දුරකතන මධ්‍යස්ථානයකින් රුපියල් 670,000ක් හා වටිනා ජංගම දුරකතනයක් සොරා ගත් ශ්‍රී ලංකා නාවික හමුදාවේ සේවය නිරත නිලධාරීන් හතර දෙනෙක් වැල්ලවත්ත පොලිසිය මඟින් ඊයේ (04) අලුයම අත්අඩංගුවට ගනු ලැබූහ.
බද්දේගම පදිංචි වයස අවුරුදු 38ක් වන නාවික හමුදාවේ සේවයේ නියුතු නිලධාරියකු ද බොරලැස්ගමුව නීලම්මහර පදිංචි වයස අවුරුදු 38ක් වන නිලධාරියකු ද ගොඩකවෙල හල්වින්න පදිංචි වයස අවුරුදු 38ක් වන නිලධාරියකු ද බිබිල පදිංචි වයස අවුරුදු 37ක නිලධාරියකු ද මෙලෙස අත්අඩංගුවට ගත් බව පොලිසිය පවසයි. මොවුන් නාවික හමුදා මූලස්ථානය, වැලිසර හා වේරහැර නාවික හමුදා කඳවුරුවල සේවයේ නියුතු නිලධාරීන් බව පොලිසිය කියයි.
පැමිණිලිකරු විසින් වැල්ලවත්ත ප්‍රදේශයේ දිවා රාත්‍රී ක්‍රියාත්මක දුරකතන මධ්‍යස්ථානයක් පවත්වාගෙන යන අතර, පෙරේදා (03) රාත්‍රී නාඳුනන පුද්ගලයන් හතරදෙනකු පැමිණ පොලිස් නිලධාරී හැඳුනුම්පතක් පෙන්වා ආයතනය පරීක්ෂාවට ලක්කළ යුතු බවට පවසා ඇත. සේවකයන් ලවා දොරවල් විවෘත කරවාගෙන ආයතනයට ඇතුළු වී එක්වරම සේවකයන්ට උල්පිහි පෙන්වා මරණීය තර්ජන එල්ල කර ගමන් මල්ලක තිබූ රුපියල් 670,000 මුදලක් ද සේවකයකුගේ වටිනා ජංගම දුරකතනයක් ද කොල්ලකා පලා ගොස් ඇත. ඒ අනුව ආයතන හිමිකරු වැල්ලවත්ත පොලිස් අපරාධ අංශ ස්ථානාධිපති උප පොලිස් පරීක්ෂක හේෂාන් කුමාර මහතා වෙත සිදු කළ පැමිණිල්ලකට අනුව වහාම පරීක්ෂණ කටයුතු නිලධාරී කණ්ඩායමක් විසින් ආරම්භ කරනු ලැබිණි. එදින රාත්‍රී 11.15 වන විට සැකකරුවන් දෙදෙනකු පොලිස් කොස්තාපල්වරයකුට අයත් පොලිස් හැඳුනුම්පතක් ද සමඟ අත්අඩංගුවට ගෙන ප්‍රශ්න කිරීමෙන් අනතුරුව අනෙක් නිලධාරීන් දෙදෙනා ද ඊයේ (04) අලුයම අත්අඩංගුවට ගැනීමට හැකියාව ලැබී තිබේ.
ඒ අනුව හෙළිවූ තොරතුරු මත මේ සඳහා සම්බන්ධ විශේෂ කාර්ය බළකා නිලධාරියකු ද අත්අඩංගුවට ගැනීම සඳහා පරීක්ෂණ කටයුතු ආරම්භ කර ඇතැයි ද පොලිසිය කියයි. වැඩිදුර පරීක්ෂණ කටයුතු කොළඹ දකුණ කොට්ඨාස භාර ජ්‍යෙෂ්ඨ පොලිස් අධිකාරි නිරංජන් අබේවර්ධන, කොළඹ දකුණ ii පොලිස් අධිකාරි ජයනාත්ද සිල්වා යන මහතුන්ගේ අධීක්ෂණය යටතේ වැල්ලවත්ත පොලිස් ස්ථානාධිපති ප්‍රධාන පොලිස් පරීක්ෂක සුභාෂ් කහඳවල මහතාගේ උපදෙස් පරිදි අපරාධ විමර්ශන අංශයේ ස්ථානාධිපති උප පොලිස් පරීක්ෂක හේෂාන් කුමාර මහතාගේ මෙහෙයවීමෙන් උප පොලිස් පරීක්ෂක තෙවරප්පෙරුම, පොලිස් සැරයන්වරුන් වන (72238) කරුණාතිලක, (68134) ප්‍රියංකර, පොලිස් කොස්තාපල්වරුන් වන (102965) චතුරංග, (97752) කරුණාරත්න, (10986) සේනානායක සහ රථ වාහන අංශ නිලධාරි පොලිස් සැරයන් (49665) රසික යන නිලධාරීහු සිදු කරති.
