රුපියල් කෝටි ගණනක් වටිනා ජංගම දුරකතන තොගයක් සහ තවත් උපාංග ඇතුළු අත් ඔරලෝසු තොගයක් මෝටර් රථයකින් ප්‍රවාහනය කරමින් සිටි පුද්ගලයන් දෙදෙනකු පෑලියගොඩ මීගමු පාරේ රාජ්‍ය ඉංජිනේරු සංස්ථාව ඉදිරිපිට හදිසි මාර්ග බාධකයේදී පොලිස් විශේෂ කාර්ය බළකාය මඟින් අත්අඩංගුවට ගෙන තිබිණ.
පොලිස් විශේෂ කාර්ය බළකායේ නිලධාරීන්ට ලද තොරතුරක් මත මෙම වැටලීම සිදු කර ඇති අතර, රජයට තීරු බදු අහිමි කරමින් හොර රහසේ ගෙන්වන ලද මෙම භාණ්ඩ අතර ජංගම දුරකතක 323ක් තිබී ඇත.මෙසේ අත්අඩංගුවට ගත් සැකකරුවන් කොළඹ 12 සහ වත්තල පදිංචි අවුරුදු 23 සහ 43 වයසේ පසුවන්නෝ වෙති. සැකකරු සන්තකයේ තිබී විවිධ වර්ගයේ ජංගම දුරකතන 241ක්, කොටස් ලබා ගැනීම සඳහා ගෙන්වන ලද ජංගම දුරකතන 77ක්, ඇපල් වර්ගයේ ඔරලෝසු 02ක්, දුරකතන චාජර් 20ක් හා අනෙකුත් ජංගම දුරකතන උපාංග කොටස් කිහිපයක් පොලිස් භාරයට ගෙන තිබේ.
පොලිස් විශේෂ කාර්ය බළකායේ අණ දෙන නිලධාරී ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ නියෝග හා උපදෙස් පරිදි අධ්‍යක්ෂ බුද්ධි ජ්‍යෙෂ්ඨ පොලිස් අධිකාරී එම්.එම්.කේ. විජේසිංහ මහතාගේ මඟපෙන්වීම පරිදි අධ්‍යක්ෂ (විශේෂ අවි හා උපක්‍රම/ සංග්‍රාමික යතුරුපැදි) පොලිස් අධිකාරී ආර්.පී.කේ.ඩී. රත්නවීර මහතාගේ අධීක්ෂණය මත විශේෂ කාර්ය බළකාය ජයවර්ධනපුර කඳවුරේ ස්ථාපිත කර ඇති C කලාපයේ රාජකාරී සඳහා යොදවා ඇති ජයවර්ධනපුර කඳවුරේ සංග්‍රාමික යතුරුපැදි කණ්ඩායම් ස්ථානාධිපති පොලිස් පරීක්ෂක එම්.ඩී.ටී. මඩපාත ඇතුළු නිලධාරීන් කණ්ඩායමක් විසින් මෙම වැටලීම සිදු කරනු ලැබීය.
