‘පූස් බුද්ධා“ නමින් මුහුණු පොතක් භාවිත කරමින් බුදු දහමට සහ බුදුන් වහන්සේට අපහාසවන අයුරින් ප්‍රකාශ පළ කළැයි රක්ෂිත බන්ධානාගරගත කර සිටි තරුණයා රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට කොළඹ ප්‍රධාන මහේස්ත්‍රාත් ප්‍රසන්න අල්විස් මහතා ඊයේ (04) නියෝග කළේය.
මෙලෙස ඇප මත මුදා හරිනු ලැබුවේ අංක 27/1, ගැමුණු මාවත, කෙහෙල්වත්ත, පාණදුර පදිංචි රණළුකගේ පසිඳු දේශික නමැති විසි දෙහැවිරිදි තරුණයෙකි.
බුදුන් වහන්සේට සහ බුදු දහමට නින්දා සහගත වන අයුරින් විවිධ පළකිරීම් හා ප්‍රකාශන සිදු කරමින් සමාජ ආරක්ෂාව සහ සමාජයෙහි යථා පැවැත්මට තර්ජනයක් වීමේ අවස්ථාවක් නිර්මාණය කරමින් ලංකා දණ්ඩ නීති සංග්‍රහයේ 290 (අ), 291 (ආ) (ආ) යන වගන්ති යටතේ සහ පොලිස් ආඥා පනතේ 98 වගන්තිය යටතේ වැරදි සිදුකර ඇති බවට සඳහන් කරමින් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසය මෙම සැකකරු අත්අඩංගුවට ගෙන අධිකරණයට ඉදිරිපත් කර තිබිණි.
බුදුහිමියන්ගේ රුවට සමාන ඡායාරූපවලට බළලකුගේ ඡායාරූප යොදාගනිමින් සකස් කර ඇති මෙම මුහුණු පොත මගින් බුදු දහමට සහ බුදුන් වහන්සේට නින්දා සහගත සහ අපහාස වන අයුරින් පෝස්ටු ප්‍රචාරය කර ඇති බවත්, මේ හේතුවෙන් ජන සමාජය තුළ කතිකාවතක් මතුවෙමින් පවතින බවත් අපරාධ පරික්ෂණ දෙපාර්තමේන්තුව අධිකරණයට කරුණු ඉදිරිපත් කරමින් සඳහන් කළේය.
අන්තර්ජාලයේ මුහුණු පොත උපයෝගී කරගනිමින් පූස් බුද්ධා සහ පූස් බුදුන්ගේ අනුගාමිකයෝ යන නමින් ගිණුම් නිර්මාණය කර ඇති බවත්, එමගින් බෞද්ධ ආගමට සහ බුදුන් වහන්සේට නින්දා සහගත අපහාස සිදුවන ආකාරයේ පළ කිරීම් සිදුකර ඇති බවත් සඳහන් කරමින් මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කරනු ලැබ තිබුණේ කීර්ති ශ්‍රී රතනනන්ද හිමියන් විසිනි.
