මහජනතාවගේ ගමනාගමන පහසුකම් වැඩිදියුණු කිරීම වෙනුවෙන් දකුණට මෙන්ම උතුරේ යාපනයටත් අලුත් බස් රථ 32 ක් ලබා දීමට පියවර ගෙන ඇත.
උතුරු, නැ‍ඟෙනහිර ප්‍රදේශවල ලංකා ගමනාගමන මණ්ඩලයේ පොදු ප්‍රවාහන සේවාවන් සැලසීම පිළිබඳ විශේෂ නිරීක්ෂණයකට එක්වෙමින් යාපනය, කොණ්ඩාවිල් හි පිහිටි උතුරු ප්‍රාදේශික කාර්යාලයේ සහ යාපනය ඩිපෝවේ දී ප්‍රවාහන, මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මේ බව කීවේය.
ඩිපෝ පරිශ්‍රය නිරීක්ෂණය කරමින් එහි පරිපාලනය සහ කනිෂ්ඨ කාර්ය මණ්ඩලයේ පවතින ගැටලු පිළිබඳ විශේෂ සාකච්ඡාවකට එක්ව අමාත්‍යවරයා මෙලෙස අදහස් දැක්වීය.
Òපසුගිය වසර කිහිපය පුරාවට දරුණු ආර්ථික ගැටලු රැසකට අපට මුහුණ දීමට සිදුවුණා. මෙතෙක් පැවැති සෑම රජයක්ම සංවර්ධන කටයුතු ඇතුළු බොහෝ කරුණු වෙනුවෙන් දිගින් දිගටම දේශීය හා විදේශ ණය ලබා ගැනීම තුළින් සහ මුදල් මුද්‍රණය තුළින් මෙන්ම කොවිඩ් වසංගතයෙන් පසුව මුහුණ දුන් අභියෝග හමුවේ, අවසානයේ රට බංකොලොත්භාවයට පත්වීම දක්වා ඇද වැටී තිබෙනවා.
මාර්ග අබලන්වීම ඇතුළු මෙම ප්‍රදේශවල ජනතාව සහ ආයතන මුහුණ දෙන අපහසුතාවයන් පිළිබඳ පැහැදිලි අවබෝධයක් අපට තිබෙනවා. එමෙන්ම මෙම ඩිපෝවල අබලන්ව පවතින බස් රථ අලුත්වැඩියා කිරීම සඳහා අමතර කොටස් අවශ්‍යයි. එන්ජින් ඇතුළු එම අමතර කොටස් ගෙන්වීම සඳහා මුදල් අවශ්‍යයි. ඉතිහාසය පුරාම මෙවැනි කටයුතු සිදු කර තිබෙන්නේ ණය ලබා ගැනීමෙන්. මීට පෙර ලබා ගත් ණය නොගෙවීම මත අලුතින් ණය ලබාගැනීමට හැකියාවක් නැහැ. ඒ සියලු ගැටලු අතරේ වුවත් පසුගිය වසරේ ඉන්දියානු ණය යෝජනා ක්‍රමය යටතේ අලුත් බස් රථ පන්සියයක් ලංගම වෙත ලබා ගැනීමට හැකි වුණා. එම ණය යෝජනා ක්‍රමය යටතේම එන්ජින් 59ක්ද ලබාගෙන තිබෙනවා. එම එන්ජින් යොදා ගනිමින් යාපනය ඩිපෝවේද බස් රථ හතරක් අලුත්වැඩියා කර තිබෙනවා.
එම සියලු සම්පත් යොදා ගනිමින් පළාතේ සියලුම ඩිපෝ ආදායම් වැඩිකර ලාභ ලබන තත්ත්වයට පත් කරගැනීමට හැකි වුවහොත් මෙම වසර තුළ ප්‍රසාද දීමනාවක් ලබාදීමේ හැකියාව පවතිනවා.
මෙම අමාත්‍යාංශයේ වගකීම බාර ගැනීමත් සමඟ අප දේශපාලන හිතවත්කම් හා ඥාති හිතමිත්‍රකම් වෙනුවෙන් තනතුරු ලබාදීම වෙනුවට විෂයානුබද්ධ දැනුමක් සහිත වෘත්තිකයින් ලංගම ඇතුළු ආයතනවල සභාපතිවරුන් ලෙස පත් කර තිබෙනවා.
මේ සියල්ල තුළින් සොරකම, වංචාව, දූෂණය, අක්‍රමිකතා වැළැක්වීම අපගේ පළමු ප්‍රතිපත්තියයි. ලංකාවේ සියලු ඩිපෝවල දිනකට රුපියල් කෝටියකට අධික මුදලක් ඇතැම් රියැදුරන්ගේ සහ කොන්දොස්තරවරුන්ගේ මූල්‍ය වංචා හේතුවෙන් ආයතනයට අහිමි ෙවනවා. මෙම සියලු මූල්‍ය අක්‍රමිකතා පිළිබඳ පරීක්ෂා කර කඩිනම් පියවර ගැනීම සඳහා පොලිස් විශේෂ කාර්ය බළකායේ විශ්‍රාමික නියෝජ්‍ය පොලිස්පතිවරයකුගේ ප්‍රධානත්වයෙන් විමර්ශන කණ්ඩායමක් පත් කර තිබෙනවා. ඒ අනුව වංචාවක් වාර්තා වූ වහාම අදාළ සේවකයන්ගේ වැඩ තහනම් කර කඩිනම් පරීක්ෂණයක් පවත්වා අධිකරණ ක්‍රියාමාර්ග ගැනීමට කටයුතු කරනවා.
ඉදිරි මාස කිහිපය තුළ ඊ ටිකටින් ක්‍රමය ලංගම බස් රථවල ක්‍රියාත්මක කිරීම ආරම්භ කිරීමටද කටයුතු කෙරෙමින් පවතිනවා. ඒ තුළින් තවදුරටත් මූල්‍ය අක්‍රමිකතා සිදුවීම පාලනය කිරීමට හැකිවනවා. එම නිසා ආයතනයේත් තම පවුල්වල පෞද්ගලික සුබසිද්ධිය උදෙසාත් වංචාවෙන්, දූෂණයෙන් තොරව වැඩ කිරීමට එක්වන ලෙස මා ඉල්ලා සිටිනවා.
ඉදිරි කාලය තුළ ඩිපෝව ලබන ආදායමෙන් මුදල් ගෙවීමේ පදනම මත නව බස් රථ දහසක් ලබා ගැනීම සඳහා කැබිනට් පත්‍රිකාවක් ඉදිරිපත් කිරීමටද අප කටයුතු කරනවා. ආයතන ලාභ ලැබීමේ තත්ත්වයට පත් කර ගැනීම තුළින් පවතින කාර්ය මණ්ඩල පුරප්පාඩු සඳහා තාවකාලික හෝ කොන්ත්‍රාත් පදනම යටතේ හෝ නව බඳවාගැනීම සිදුකිරීමේ හැකියාව පවතිනවා.
ලංගම පුද්ගලිකරණය කිරීම සඳහා මම ඉඩ ලබාදෙන්නේ නැහැ. ඉදිරි පරම්පරාවන් උදෙසා භාවිත කළ හැකි නිසි ක්‍රමවේදයක් සකස් කිරීම තුළින් කවුරුන් පාලකයින් බවට පත් වුවත් ඒ අනුව කටයුතු කිරීමේ හැකියාව පවතිනවා.Ó
අමාත්‍යවරයාගේ සංචාරය සිහිපත් කරමින් ඩිපෝ කාර්ය මණ්ඩලය මඟින් අමාත්‍යවරයා වෙත විශේෂ සමරු තිළිණයක් පිරිනැමීමද සිදුවිය.
ලංකා ගමනාගමන මණ්ඩලයේ නියෝජ්‍ය සාමාන්‍යාධිකාරී (ධාවන) පණ්ඩුක ස්වර්ණහංස මහතා, උතුරු ප්‍රාදේශිකයේ ප්‍රධාන කළමනාකාර ආර්. එම්. ඩී. විජිත ධර්මසේන මහතා, යාපනය ඩිපෝ කළමනාකාර එන්. ගුණසීලන් මහතා ඇතුළු කාර්ය මණ්ඩල සාමාජිකයින් මේ අවස්ථාවට එක්ව සිටියහ.
බස් රථ අංගණය ඇමැතිවරයා පරික්ෂා කළ අයුරු
