පාතාල කල්ලි නායකයකු හා මත්ද්‍රව්‍ය ජාවාරම්කරුවකු යැයි පැවසෙන කුඩු රොෂාන් හෙවත් ටී.ඒ. ප්‍රසාද් රුක්මන් යන අයගේ ජා-ඇළ, රජවත්ත ටෙරස්හි පිහිටි නිවස ආරක්ෂක අංශ විසින් ඊයේ (04) සෝදිසියට ලක් කරනු ලැබීය.
කොළඹ ප්‍රධාන මහේස්ත්‍රාත්වරයාගෙන් ලබාගත් සෝදිසි වරෙන්තුවක් මත, පොලිස් නීති විරෝධී වත්කම් විමර්ශන ඒකකය, විශේෂ කාර්ය බළකාය, අපරාධ පරීක්ෂණාගාර (soco) යන අංශවල නිලධාරීන් සෝදිසි මෙහෙයුමට එක්වී සිටියහ. 
මේ සෝදිසි මෙහෙයුම සඳහා එක්ව සිටි නිලධාරී මහතකු ප්‍රකාශ කර සිටියේ මිනීමැරීම් ඇතුළු අපරාධ ගණනාවක් සඳහා කුඩු රොෂාන්ට එරෙහිව මහාධිකරණයේ නඩු කිහිපයක් විභාග වන බවයි. එසේම මේ වන විට පොලිස් අත්අඩංගුවට පත්ව ඇති කුඩු රොෂාන්ගේ අපරාධ පිළිබඳ දීර්ඝ පොලිස් විමර්ශන කටයුතු සිදු කෙරෙමින් තිබේ. සෝදිසි මෙහෙයුමේදී කුඩු රොෂාන්ගේ නිවසේ තිබී කඩු දෙකක් සොයාගෙන ඇති අතර, නිවසේ තිබූ ටොයොටා CHR වර්ගයේ රු. මිලියන 12ක් පමණ වටිනා සුඛෝපභෝගී කාර් රථයක් ද ආරක්ෂක අංශ නිලධාරීන් භාරයට ගෙන තිබේ.
මේ ආරක්ෂක මෙහෙයුම සඳහා නීති විරෝධී වත්කම් විමර්ශන අංශයේ නියෝජ්‍ය අධ්‍යක්ෂක, පොලිස් අධිකාරී අනුර ප්‍රේමරත්න මහතාගේ උපදෙස් මත එහි ස්ථානාධිපති, ප්‍රධාන පොලිස් පරීක්ෂක සුසිල් ඩී. සිල්වා, උප පොලිස් පරීක්ෂක හේරත්, පො.සැ. හේරත් (34835), පොලිස් කොස්තාපල්වරුන් වන අමරසේන(34835), අකලංක(104598), සදරුවන්(104593) යන නිලධාරීන් හා විශේෂ කාර්ය බළකායේ පොලිස් පරීක්ෂක හෙට්ටිආරච්චි යන නිලධාරීහු එක්ව සිටියහ.
